കൊച്ചി: സ്റ്റേറ്റ് ബാങ്ക് ഓഫ് ഇന്ത്യയുടെ കേരളത്തിലെ 197 ശാഖകള്‍ അടച്ചുപൂട്ടാന്‍ തീരുമാനമായി. എസ്.ബി.ടി ഉള്‍പ്പെടെയുള്ള വിവിധ സംസ്ഥാനങ്ങളിലെ അഞ്ച് അസോസിയേറ്റ് ബാങ്കുകളുടെയും ഭാരതീയ മഹിളാ ബാങ്കിന്റെയും ലയനം നടന്ന് ഒരു മാസം പിന്നിടുമ്പോഴാണ് എസ്.ബി.ഐ വിവിധ ശാഖകള്‍ അടച്ചുപൂട്ടാന്‍ തയാറെടുക്കുന്നത്. എറണാകുളം ജില്ലയിലാണ് ഏറ്റവും കൂടുതല്‍ ശാഖകള്‍ അടച്ചുപൂട്ടുന്നത്. 33 ശാഖകളാണ് ഇവിടെ അടച്ചുപൂട്ടുക.
അര കിലോമീറ്റര്‍ ചുറ്റളവിനുള്ളില്‍ ഒന്നിലധികം ശാഖകള്‍ വേണ്ടെന്നാണ് എസ്.ബി.ഐ മാനേജ്‌മെന്റിന്റെ തീരുമാനം. ശാഖകള്‍ അടച്ചുപൂട്ടുന്നതോടെ ഓഫിസര്‍ തസ്തികയിലുള്ളവരെ രാജ്യത്തിന്റെ വിവിധ ഭാഗങ്ങളിലെ ബ്രാഞ്ചുകളിലേക്ക് സ്ഥലംമാറ്റിയേക്കും.
ക്ലറിക്കല്‍ തസ്തികയിലുള്ളവരെ സംസ്ഥാനത്തിന്റെ വിവിധ ശാഖകളിലേക്ക് സ്ഥലംമാറ്റുമെന്നാണ് സൂചന. സ്ഥാനക്കയറ്റം സംബന്ധിച്ചും ആശങ്ക നിലനില്‍ക്കുന്നുണ്ട്. 852 ശാഖകളിലായി 8,500 ഓളം ജീവനക്കാരും അയ്യായിരത്തോളം ഓഫിസര്‍ റാങ്കിലുള്ളവരുമാണ് എസ്.ബി.ടിക്ക് കേരളത്തിലുണ്ടായിരുന്നത്.
ലയനം പ്രാബല്യത്തില്‍ വന്നതോടെ ഇത്രയും ജീവനക്കാരും എസ്.ബി.ഐയുടെ ഭാഗമായി മാറി. എന്നാല്‍ ഇത്രയധികം ജീവനക്കാരെ ആവശ്യമായി വരില്ലെന്നും മുപ്പത് ശതമാനം ശാഖകള്‍ അടച്ചുപൂട്ടണമെന്നും ഉപദേശക കമ്മിറ്റി നിര്‍ദേശിച്ചിരുന്നു. ജീവനക്കാരുടെ എണ്ണം കുറക്കാന്‍ സ്വമേധയാ പിരിഞ്ഞുപോകാന്‍ (വി.ആര്‍.എസ്) നേരത്തെ ജീവനക്കാര്‍ക്ക് എസ്.ബി.ഐ നിര്‍ദേശം നല്‍കിയിരുന്നു.
ലയിച്ച ബാങ്കുകളുടെ ബ്രാഞ്ചുകള്‍ കൂടി എസ്.ബി.ഐയുടെ പേരില്‍ തുറന്നതോടെ കെട്ടിട വാടക, വൈദ്യുതി നിരക്ക് തുടങ്ങിയ ഇനങ്ങളിലും വന്‍തുക എസ്.ബി.ഐയ്ക്ക് ചെലവാകുന്നു എന്നതും ബ്രാഞ്ചുകള്‍ അടച്ചുപൂട്ടാന്‍ കാരണമായിട്ടുണ്ട്. സ്‌റ്റേറ്റ് ബാങ്ക് ഓഫ് ട്രാവന്‍കൂര്‍, സ്റ്റേറ്റ് ബാങ്ക് ഓഫ് ജയ്പൂര്‍, സ്റ്റേറ്റ് ബാങ്ക് ഓഫ് ഹൈദരാബാദ്, സ്റ്റേറ്റ് ബാങ്ക് ഓഫ് മൈസൂര്‍, സ്റ്റേറ്റ് ബാങ്ക് ഓഫ് പാട്യാല, ഭാരതീയ മഹിളാ ബാങ്ക് എന്നിവയാണ് എസ്.ബി.ഐയില്‍ ലയിപ്പിച്ചത്.
എസ്.ബി.ഐയെ അന്താരാഷ്ട്രാതലത്തില്‍ മികവുറ്റ 50 ബാങ്കുകളില്‍ ഒന്നാക്കി മാറ്റുക എന്ന ലക്ഷ്യത്തോടെ ഏപ്രില്‍ ഒന്നിനാണ് കേന്ദ്ര സര്‍ക്കാര്‍ ലയനം നടപ്പാക്കിയത്.

അടച്ചുപൂട്ടുന്ന ശാഖകളുടെ എണ്ണം ജില്ലതിരിച്ച്

തിരുവനന്തപുരം 16
കൊല്ലം 25
പത്തനംതിട്ട ഒന്‍പത്
കോട്ടയം 17
ആലപ്പുഴ 10
ഇടുക്കി നാല്
എറണാകുളം 33
തൃശൂര്‍ 22
പാലക്കാട് എട്ട്
മലപ്പുറം 12
കോഴിക്കോട് 19
വയനാട് രണ്ട്
കണ്ണൂര്‍ 12
കാസര്‍കോട് എട്ട്