കൊടുങ്ങല്ലൂര്‍: പുതിയ കിണര്‍ നിര്‍മാണം കഴിഞ്ഞ് കിണറില്‍ നിന്നും മുകളിലേക്ക് കയറുന്നതിനിടയില്‍ താഴെ വീണ തൊഴിലാളിയെ അഗ്നിശമനസേനയെത്തി രക്ഷപ്പെടുത്തി ആശുപത്രിയിലെത്തിച്ചു. പുല്ലൂറ്റ് കോഴിക്കട കാരപ്പറമ്പില്‍ റഹീം (32) നെയാണ് നട്ടെല്ലിന് ഗുരുതര പരുക്കേറ്റ നിലയില്‍ താലൂക്ക് ആശുപത്രിയില്‍ പ്രവേശിപ്പിച്ചത്. ചാപ്പാറ മാത്തേലി സുനില്‍ എന്നയാളുടെ വീട്ടില്‍ പുതിയ കിണര്‍ നിര്‍മിക്കുന്നതിനിടയില്‍ വ്യാഴാഴ്ച രാവിലെ പത്ത് മണിയോടെയാണ് അപകടം. കിണര്‍ നിര്‍മാണം പൂര്‍ത്തീകരിച്ച് കിണറ്റില്‍ നിന്നും കയറി പുറത്തേക്കിറങ്ങുന്നതിന് തൊട്ടുമുമ്പായി കൈകള്‍ കുഴഞ്ഞ് പിടിവിട്ട് ഇയാള്‍ കിണറ്റിലേക്ക് വീഴുകയായിരുന്നു.
ഇയാളോടൊപ്പമുണ്ടായിരുന്നവര്‍ സുരക്ഷിതമായി പുറത്തെത്തിയിരുന്നു. സംഭവസ്ഥലത്തുണ്ടായിരുന്നവര്‍ ഉടനെ അഗ്നിശമനസേനയെ വിവരമറിയിക്കുകയും സ്റ്റേഷന്‍ ഓഫീസര്‍ സുനില്‍ ജോസിന്റെ നേതൃത്വത്തിലെത്തിയ ജീവനക്കാര്‍ രക്ഷാപ്രവര്‍ത്തനം നടത്തുകയായിരുന്നു. ഫയര്‍മാന്‍ പി.എസ്. ശ്രീജിത്താണ് കിണറ്റിലിറങ്ങി പരുക്കേറ്റയാളെ രക്ഷപ്പെടുത്തി പുറത്തെത്തിച്ചത്.