കൊണ്ടോട്ടി: നഗരത്തോട് ചേര്‍ന്നുളള കൊണ്ടോട്ടി വലിയ തോടിന് കുറുകെ രണ്ടു കിലോമീറ്റര്‍ ചുറ്റളവില്‍ നിര്‍മിച്ചത് 20 കോണ്‍ക്രീറ്റ് പാലങ്ങള്‍. പ്രധാന റോഡുകളുടെ കുറുകെയും ജലസേചനത്തിനായി വി.സി.ബിയും നിര്‍മിച്ചതോടെയാണ് വലിയതോട് കോണ്‍ക്രീറ്റ് പാലങ്ങളുടെ പിടിയിലമര്‍ന്നത്. കൊണ്ടോട്ടി ജനതാബസാര്‍ ബൈപാസ് മുതല്‍ ചക്കുങ്ങല്‍അരു വിമാനത്താവള റോഡ് വരെയാണ് ഇത്രയും പാലങ്ങള്‍ പണിതിരിക്കുന്നത്.
വിവിധ സമയങ്ങളിലായി പണിത പാലങ്ങള്‍ പലതും ഉപയോഗശൂന്യമായി കിടക്കുകയാണ്.കൊണ്ടോട്ടി ബൈപാസ് റോഡ് ജനതാബസാര്‍ ഭാഗത്ത് നാലു പാലങ്ങളാണ് അടുത്തടുത്തായി സ്ഥാപിച്ചിരിക്കുന്നത്. ഇതിനടത്ത് തന്നെ പഴയ പാലത്തിന്റെ തൂണുകളും കാണാം. ആശുപത്രിയിലേക്കും സ്വാകാര്യ വ്യക്തികളുടെ സ്ഥലങ്ങളിലേക്കുമായി മൂന്ന് പാലങ്ങളുണ്ടിവിടെ. ഇതിന് ഇടക്കായി തോടിനു കുറുകെ ഉപയോഗ ശൂന്യമായ വി.സി.ബിയും കാണാനാകും. വലിയ തോട്ടില്‍ ഫില്ലര്‍ സ്ഥാപിച്ച് നിര്‍മിച്ച പാലങ്ങള്‍ വര്‍ഷക്കാലത്ത് വെള്ളം കുത്തിയൊഴുകി പോവുന്നതിന് തടസമാകുന്നുണ്ട്. മാലിന്യങ്ങള്‍ അടിഞ്ഞുകൂടാനും ഇത് കാരണമാകുന്നു. കൊണ്ടോട്ടി കൊടിമരം, ദയാനഗര്‍, കൊടാമ്പാടം, ചക്കുങ്ങല്‍ അരു ഭാഗത്തും പാലങ്ങള്‍ക്ക് കുറവില്ല. ദയാനഗര്‍ ഭാഗത്ത് ഒരു പുതിയ പാലത്തിന് കൂടി ലഭിച്ചിട്ടുണ്ട്. നിലവിലെ പാലം വീതി കുറവായതിനാലാണ് പുതിയ പാലം പണിയുന്നത്.
റോഡിന് കൂറുകെ പാലം പണിയുമ്പോഴും കൃഷി ആവശ്യത്തിന് വെള്ളം കെട്ടിനിര്‍ത്താന്‍ സ്ഥാപിച്ച വി.സി.ബികള്‍ പലതും പ്രയോജനമില്ലാതെ നശിക്കുകയാണ്.
ഇരുപത് പാലങ്ങളില്‍ രണ്ടെണ്ണം മാത്രമാണ് പേരിന് അണകെട്ടി വെളളം കെട്ടി നിര്‍ത്തി കൃഷി ആവശ്യങ്ങള്‍ക്കായി പ്രയോജനപ്പെടുത്തുന്നത്. കര്‍ഷകരുടെ ആവശ്യം മുന്‍നിര്‍ത്തി പല ഘട്ടങ്ങളിലായി പണിതതാണ് വി.സി.ബികള്‍.
മഴക്കാലത്ത് തോട്ടില്‍ വെള്ളത്തിന്റെ കുത്തിയൊഴിക്കിനെ തടയുന്നതിന് മാത്രമാണ് ഇത്തരം മേല്‍പ്പാലങ്ങളുടെ അവസ്ഥ. ഇതോടെ മഴ കനത്താല്‍ അങ്ങാടിയിലേക്ക് വെളളം ഇരച്ചുകയറുന്നതും പതിവാണ്. തകര്‍ന്നതും ഉപയോഗ്യമല്ലാത്തതുമായ മേല്‍പ്പാലങ്ങള്‍ മുഴുവന്‍ നീക്കം ചെയ്യണമെന്നാവശ്യവും ശക്തമാണ്.