തൊടുപുഴ: ഒരു മത ചിഹ്നത്തിന്റെ പേരിലും കേരളത്തിലെ വനഭൂമി കയ്യേറാന്‍ ആരെയും അനുവദിക്കില്ലെന്നും പുതിയ കയ്യേറ്റങ്ങള്‍ ഒഴിപ്പിച്ച് 1977 ന് മുന്‍പ് കുടിയേറിയവരെ സംരക്ഷിക്കുമെന്നും വനം വകുപ്പ് മന്ത്രി കെ രാജു പറഞ്ഞു. കേരള സ്റ്റേറ്റ് ഫോറസ്റ്റ് പ്രൊട്ടക്ടീവ് സ്റ്റാഫ് ഓര്‍ഗനൈസേഷന്റെ രണ്ടാം സംസ്ഥാന സമ്മേളനം കുമളിയില്‍ ഉദ്ഘാടനം ചെയ്ത്  സംസാരിക്കുകയായിരുന്നു അദ്ദേഹം.
  ദിവസക്കൂലി വാച്ചര്‍മാരുടെ ശമ്പളം വര്‍ധിപ്പിക്കും.
ജീവനക്കാരുടെ ജോലി ഭാരം ലഘൂകരിക്കാന്‍ നടപടി ഉണ്ടാകും. പുതിയ ഫോറസ്റ്റ് സ്‌റ്റേഷനുകളും ക്യാമ്പ് ഷെഡുകളും അനുവദിക്കുമെന്നും വാച്ചര്‍ തസ്തികയിലെ ജാതിപ്പേരുകള്‍ ഒഴിവാക്കുമെന്നും മന്ത്രി ഉറപ്പു നല്‍കി. സംതൃപ്തരായ ജീവനക്കാരാണ് വകുപ്പിനാവശ്യം. അവര്‍ക്കു മാത്രമേ നന്നായി പ്രവര്‍ത്തിക്കാന്‍ കഴിയൂ എന്നും മന്ത്രി പറഞ്ഞു.
  വനഭൂമി അടിയന്തിരമായി ജണ്ടകള്‍ ഇട്ട് അതിര്‍ത്തി തിരിക്കും. റവന്യു വകുപ്പുമായി സഹകരിച്ചായിരിക്കും അതിര്‍ത്തി നിര്‍ണ്ണയം നടത്തുക എന്ന് മന്ത്രി പറഞ്ഞു. സമ്മേളനത്തില്‍ ഇ എസ് ബിജിമോള്‍ എം എല്‍ എ അധ്യക്ഷനായി.