കോട്ടത്തറ: പ്രളയം ദുരിതം വിതച്ച കോട്ടത്തറ പഞ്ചായത്തുകാരുടെ കുടിവെള്ള ക്ഷാമം രൂക്ഷമാകുന്നു. ശക്തമായ മഴയില്‍ ജലവിതരണ പദ്ധതിയുടെ പമ്പ് ഹൗസില്‍ വെള്ളംകയറി മോട്ടോറുകള്‍ നശിച്ചതോടെയാണ് അറുനൂറോളം കുടുംബങ്ങളുടെ കുടിവെള്ളം മുട്ടിയത്.
കഴിഞ്ഞ 10 ദിവസത്തിലധികമായി പമ്പ് ഹൗസില്‍ നിന്ന് വെള്ളമടിക്കാനായിട്ടില്ല. 35, 20 എച്ച്.പി കപ്പാസിറ്റികളുള്ള രണ്ടു മോട്ടോറുകളാണ് വെള്ളം കയറി നശിച്ചിരിക്കുന്നത്. പമ്പ് ഹൗസിനുള്ളില്‍ ചെളി നിറഞ്ഞ നിലയിലാണ് ഇപ്പോഴും. മോട്ടോറുകളുടെ സ്റ്റാര്‍ട്ടര്‍, വയറിങുകള്‍ തുടങ്ങിയവയെല്ലാം നശിച്ചു. ഏകദേശം ഒന്‍പത് ലക്ഷം രൂപയെങ്കിലും വേണം പമ്പ് ഹൗസ് പ്രവര്‍ത്തന ക്ഷമമാകാന്‍.
വാട്ടര്‍ അതോറിറ്റിയില്‍ നിന്ന് കോട്ടത്തറ ഗ്രാമപഞ്ചായത്ത് ഏറ്റെടുത്തതാണ് വെണ്ണിയോട് മഹാവിഷ്ണു ക്ഷേത്രത്തിന് സമീപത്തെ ഈ പമ്പ് ഹൗസ്. മാസങ്ങള്‍ക്ക് മുന്‍പ് മാത്രമാണ് ഇത് പ്രവര്‍ത്തനം തുടങ്ങിയത്.
കോട്ടത്തറ പഞ്ചായത്തിലെ ഏതാണ്ട് നിരവധി പ്രദേശങ്ങളില്‍ കുടിവെള്ളമെത്തുന്നത് ഈ പദ്ധതി വഴിയാണ്. പഞ്ചായത്തിലാകെ 126 ഗാര്‍ഹിക കണക്ഷനുകള്‍ക്കും 96 പബ്ലിക് ടാപ്പുകളിലേക്കും 15 നോണ്‍ ഡൊമെസ്റ്റിക് കണക്ഷനുകള്‍ക്കും ഇവിടെ നിന്നാണ് വെള്ളമെത്തിക്കുന്നത്. കരിഞ്ഞകുന്ന്, കോട്ടത്തറ ടൗണ്‍, വെണ്ണിയോട്, വാളല്‍, മെച്ചന, മൈലാടി, മേലെ മൈലാടി, പള്ളിക്കുന്നത് തുടങ്ങിയ പ്രദേശങ്ങളിലെ 450ലധികം കുടുംബങ്ങള്‍ ആശ്രയിക്കുന്നതും ഈ കുടിവെള്ള പദ്ധതിയേയാണ്. പ്രളയത്തെത്തുടര്‍ന്ന് കിണറുകളിലും മറ്റ് കുടിവെള്ള സ്രോതസുകളിലും ചെളി നിറഞ്ഞ് മലിനമായ സാഹചര്യത്തില്‍ പ്രദേശവാസികളുടെ ഏക ആശ്രയമായിരുന്നു പമ്പ് ഹൗസ്. എന്നാല്‍ പാടെ നശിച്ച ഈ പമ്പ് ഹൗസില്‍ നിന്ന് ഇനി എന്ന് വെള്ളം പമ്പ് ചെയ്ത് തുടങ്ങാനാവുമെന്ന് പോലും അധികൃതര്‍ക്കറിയില്ല.
അറ്റകുറ്റപ്പണികള്‍ക്ക് വേണ്ടി വരുന്ന തുക എത്രയും പെട്ടെന്ന് അനുവദിച്ച് പ്രളയത്തില്‍ എല്ലാം തകര്‍ന്ന ഇവിടത്തുകാര്‍ക്ക് കുടിവെള്ളമെങ്കിലും ഉറപ്പാക്കാന്‍ ജില്ലാ ഭരണകൂടം അടിയന്തിര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.