കൊച്ചി: എച്ച്.എം.എസ് ദേശീയ നിര്‍വാഹക സമിതിയുടെ നേതൃത്വത്തില്‍ 350 കോടി രൂപയുടെ സഹായം കേരള ദുരിതാശ്വാസ നിധിയിലേക്ക് സംഘടിപ്പിക്കുമെന്ന് ദേശീയ സെക്രട്ടറി തമ്പാന്‍ തോമസ് വാര്‍ത്താസമ്മേളനത്തില്‍ പറഞ്ഞു.
റയില്‍വേ മേഖലയിലെ എല്ലാ തൊഴിലാളികളുടെയും ഒരു ദിവസത്തെ വേതനം കേരള ദുരിതാശ്വാസ നിധിയിലേക്ക് നല്‍കണമെന്ന് എച്ച്.എം.എസ് അഭ്യര്‍ഥിച്ചു. വെസ്റ്റേണ്‍ സെന്‍ട്രല്‍ റയില്‍വേ, വെസ്റ്റേണ്‍ റയില്‍വേ, നോര്‍ത്തേണ്‍ റയില്‍വേ എന്നിവിടങ്ങളിലെ മൂന്നുലക്ഷം തൊഴിലാളികളുടെ ദിവസ വേതനമായ നൂറുകോടിയോളം രൂപ ശേഖരിച്ച് എത്തിക്കാന്‍ മാനേജ്‌മെന്റിനോട് യൂനിയന്‍ ആവശ്യപ്പെട്ടുകഴിഞ്ഞു.
ഇവ കൂടാതെ സംഘടനകള്‍ അവരുടെ ഫണ്ടില്‍ നിന്ന് ഓരോ ലക്ഷം രൂപ നല്‍കുന്നുണ്ട്. ആറ് ലക്ഷം അംഗങ്ങളുള്ള കല്‍ക്കരി മേഖലയിലെ കൊയ്‌ല മസ്ദൂര്‍ സഭ ഒരു ദിവസത്തെ വേതനമായ നൂറുകോടി രൂപയും നല്‍കും.
കോള്‍ ഇന്ത്യ ലിമിറ്റഡ് 25 കോടി രൂപ മാനേജ്‌മെന്റ് വകയായി നല്‍കും. തമിഴ്‌നാട് ഇലക്ട്രിസിറ്റി എംപ്ലോയീസ് ഫെഡറേഷനും ദിവസ വേതനം ദുരിതാശ്വാസ നിധിയിലേക്ക് നല്‍കും.
ഐ.എല്‍.ഓയുടെ ഇന്ത്യ ഓഫിസ് കേരളത്തില്‍ ട്രേഡ് യൂനിയനുകള്‍ മുഖേന പ്രളയബാധിതരുടെ പുനരധിവാസ പരിപാടികള്‍ തയാറാക്കുന്നതിന് സെപ്റ്റംബറില്‍ പ്രത്യേക സെമിനാര്‍ നടത്തുമെന്നും തമ്പാന്‍ തോമസ് അറിയിച്ചു.
അന്തര്‍ദേശീയ തലത്തില്‍ ലഭിക്കുന്ന സംഭാവനകള്‍ നിരസിക്കുന്ന കേന്ദ്ര സര്‍ക്കാര്‍ നിലപാട് മനുഷ്യത്വ രഹിതമാണെന്നും അദ്ദേഹം കൂട്ടിച്ചേര്‍ത്തു.