ന്യൂഡല്‍ഹി: അന്തര്‍ സംസ്ഥാന ഗതാഗതത്തിന് സംസ്ഥാനങ്ങള്‍ സ്വന്തമായി നിയന്ത്രണങ്ങള്‍ ഏര്‍പ്പെടുത്തരുതെന്നാവശ്യപ്പെട്ട് കേന്ദ്ര ആഭ്യന്തര സെക്രട്ടറി അജയ് ഭല്ല സംസ്ഥാന ചീഫ് സെക്രട്ടറിമാര്‍ക്ക് കത്തെഴുതി. പല സംസ്ഥാനങ്ങളും ജില്ലാ ഭരണകൂടവുമെല്ലാം സ്വന്തമായി നിയന്ത്രണങ്ങള്‍ ഏര്‍പ്പെടുത്തുന്നത് ശ്രദ്ധയില്‍പ്പെട്ടിട്ടുണ്ടെന്നും ഇത് പ്രകൃതി ദുരന്ത നിയമത്തിന്റെ അടിസ്ഥാനത്തില്‍ കേന്ദ്രസര്‍ക്കാര്‍ പുറത്തിറക്കിയ മാര്‍ഗരേഖയുടെ ലംഘനമാണെന്നും കത്തില്‍ ചൂണ്ടിക്കാട്ടി.

അന്തര്‍ സംസ്ഥാന യാത്രകള്‍ക്കും ചരക്കു നീക്കത്തിനും നിയന്ത്രണങ്ങള്‍ ഏര്‍പ്പെടുത്തുകയോ പ്രത്യേക അനുമതി നേടാന്‍ ആവശ്യപ്പെടുകയോ പാസ് ഏര്‍പ്പെടുത്തുകയോ ചെയ്യാന്‍ പാടില്ലെന്ന് കേന്ദ്രം നേരത്തെ തന്നെ മാര്‍ഗരേഖയില്‍ നിര്‍ദ്ദേശം നല്‍കിയതാണ്. ഇത് പരിഗണിക്കാതെയാണ് പ്രാദേശിക തലത്തില്‍ പലരും നിയന്ത്രണം കൊണ്ടുവന്നിരിക്കുന്നത്. ഇത് രാജ്യത്തെ ചരക്കു ഗതാഗതത്തിനും സാമ്പത്തിക വാണിജ്യപ്രവര്‍ത്തനങ്ങള്‍ക്ക് തടസ്സമുണ്ടാക്കുന്നുണ്ട്. അതിനാല്‍ കേന്ദ്ര മാര്‍ഗരേഖയില്‍ നിന്നുള്ള നിയന്ത്രണങ്ങള്‍ മാത്രമേ പാടുള്ളൂവെന്നും അജയ്ഭല്ല കത്തില്‍ ചൂണ്ടിക്കാട്ടി.