തിരുവനന്തപുരം: കേരളത്തില്‍ ജനം കൂട്ടത്തോടെ ഇറങ്ങി വോട്ടിലൂടെ വിധിയെഴുതുന്നത് ഇതാദ്യമല്ല. 1977ല്‍ അടിയന്തരാവസ്ഥയ്‌ക്കൊടുവിലും മണ്ഡല്‍ കമ്മിഷന്‍ റിപ്പോര്‍ട്ടും ഷാബാനു കേസും ചര്‍ച്ച ചെയ്ത 1989ലും കനത്ത പോളിങ്ങാണ് സംസ്ഥാനത്തു നടന്നത്.

1957ല്‍ 66.05 ശതമാനമായിരുന്നു. 1962ലേക്ക് കടന്നപ്പോള്‍ അത് 70.55 ശതമാനമായി ഉയര്‍ന്നു. 1967ല്‍ 75.64 ശതമാനമായി പോളിങ് ഉയര്‍ന്നെങ്കിലും 1971ല്‍ അത് കുത്തനെ കുറഞ്ഞ് 64.53 ശതമാനമായി. പിന്നീട് കൂടിയത് 1977ലാണ്. അടിയന്തരാവസ്ഥയെ കടലില്‍ തള്ളും എന്ന ഇടതുമുന്നണിയുടെ മുദ്രാവാക്യവും അക്രമരാഷ്ട്രീയം കടലില്‍ തള്ളുമെന്ന യു.ഡി.എഫിന്റെ പ്രചാരണവും ശക്തമായപ്പോള്‍ ജനമിറങ്ങി വോട്ട് ചെയ്തു. 79.2 ശതമാനമായിരുന്നു പോളിങ്.

എന്നാല്‍ 1980ല്‍ വീണ്ടും കുറഞ്ഞു. 62.16 ശതമാനമായിരുന്നു പോളിങ്. 1989ല്‍ 79.3 ശതമാനമായി പോളിങ് ഉയര്‍ന്നു. പിന്നീടിങ്ങോട്ട് 70 ശതമാനത്തിനു താഴെ വന്നില്ല. 1991ല്‍ 73.32 ശതമാനവും 1996ല്‍ 71.11 ശതമാനവും 1998ല്‍ 70.66 ശതമാനവും 1999ല്‍ 70.19 ശതമാനവും 2004ല്‍ 71.45 ശതമാനവും 2009ല്‍ 73.38 ശതമാനവും 2014ല്‍ 73.94 ശതമാനവും വോട്ടുകളാണ് പോള്‍ ചെയ്തത്.