ചേളാരി: സമസ്ത കേരള ജംഇയ്യത്തുല്‍ മുഅല്ലിമീന്‍ ഇന്ന് സംസ്ഥാനത്തിനകത്തും പുറത്തുമുള്ള പതിനായിരത്തിലേറെ മദ്‌റസ മഹല്ല് തലങ്ങളില്‍ മുഅല്ലിം ഡേ സമുചിതമായി ആചരിക്കും. കോവിഡ് പ്രോട്ടോക്കോള്‍ പാലിച്ച് മജ്‌ലിസുന്നൂര്‍, ആസ്വാദനം, ആദരം, സാമാജികം, പ്രാര്‍ഥനാ സദസ്സ്, ഫണ്ട് സമാഹരണം എന്നിവയാണ് മുഅല്ലിം ഡേ കാംപയിനിന്റെ ഭാഗമായി നടക്കുന്നത്. 19ന് തുടങ്ങിയ കാംപയിനിന്റെ സംസ്ഥാനതല ഉദ്ഘാടനം സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളാണ് നിര്‍വഹിച്ചത്. തുടര്‍ന്ന് ജില്ലാ, മേഖലാ, റെയിഞ്ച് തല ഉദ്ഘാടന പരിപാടികള്‍ നടന്നു. 28ന് ഫണ്ട് സമാഹരണം നടക്കും.
സെപ്റ്റംബര്‍ 10ന് കാംപയിനിന്റെ സമാപന സംഗമം പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. മാണിയൂര്‍ അഹ്മദ് മുസ്‌ലിയാര്‍ ദുആ സദസ്സിന് നേതൃത്വം നല്‍കും. പ്രൊഫ. കെ. ആലിക്കുട്ടി മുസ്‌ലിയാര്‍, പി.കെ.പി അബ്ദുസ്സലാം മുസ്‌ലിയാര്‍, എം.ടി അബ്ദുല്ല മുസ്‌ലിയാര്‍, ഡോ. ബഹാഉദ്ദീന്‍ മുഹമ്മദ് നദ്‌വി, വാക്കോട് മൊയ്തീന്‍ കുട്ടി മുസ്‌ലിയാര്‍ സംബന്ധിക്കും.