വള്ളുവമ്പ്രം: സമസ്തയുടേയും മുസ്‌ലിം ലീഗിന്റെയും സജീവ പ്രവര്‍ത്തകന്‍ മോങ്ങം ഹില്‍ടോപ്പ് സ്വദേശി മന്നത്തൊടി ഹംസ മാസ്റ്ററുടെ വേര്‍പാട് നാടിനെ ദുഃഖത്തിലാഴ്ത്തി. കൊണ്ടോട്ടി മണ്ഡലം മുസ്‌ലിം ലീഗ് ജോ. സെക്രട്ടറിയായും മൊറയൂര്‍ പഞ്ചായത്ത് മുസ്‌ലിം ലീഗ്, യൂത്ത് ലീഗ് സെക്രട്ടറിയായും പ്രവര്‍ത്തിച്ചിരുന്നു. കൂടാതെ മോങ്ങം മഹല്ല് കമ്മിറ്റി, ഇര്‍ഷാദുസ്സിബിയാന്‍ മദ്‌റസ എന്നിവയുടെ സെക്രട്ടറിയായും സേവനം അനുഷ്ടിച്ചിരുന്നു. മദ്‌റസ പരിപാലനത്തിന് ഏറെ ശ്രദ്ധ പുലര്‍ത്തിയിരുന്ന ഇദ്ദേഹം മഹല്ലില്‍ നടന്ന് വന്നിരുന്ന സ്വലാത്ത് മജ്‌ലിസുകള്‍ക്ക് നേതൃത്വം നല്‍കിയിരുന്നു. ഒളമതില്‍ പി.എം.എസ്.എ.എം എ.യുപി സ്‌കൂളിലെ റിട്ട. ഉറുദു അധ്യാപകനായിരുന്ന ഇദ്ദേഹം കെ.യു.ടി.എ യുടെ ജില്ലാ കമ്മിറ്റിയംഗമായും പ്രവര്‍ത്തിച്ചിരുന്നു.
മത, സാമൂഹിക, രാഷ്ട്രീയ രംഗത്ത് സദാസമയം ജാഗരൂകനായി പ്രവര്‍ത്തിച്ചിരുന്ന ഹംസ മാസ്റ്ററുടെ വിയോഗം നാടിനെ ഏറെ കണ്ണീരണിയിച്ചു.
വിയോഗത്തെ തുടര്‍ന്ന് നാടിന്റെ നാനാതുറകളില്‍ നിന്ന് നിരവധി പേര്‍ ഹില്‍ടോപ്പിലെ വസതിയിലെത്തി ജനാസ സന്ദര്‍ശിച്ചു. ഖബറടക്കം വൈകിട്ട് 5.30 ന് മഹല്ല് ജുമാമസ്ജിദില്‍ നടന്നു. അനുസ്മരണ യോഗത്തില്‍ സി.കെ മുഹമ്മദ് അധ്യക്ഷനായി.