ചേരമ്പാടി: ആദിവാസി യുവാവിനെ വെട്ടിക്കൊലപ്പെടുത്തിയ സംഭവത്തില്‍ ഒരാളെ പൊലിസ് അറസ്റ്റ് ചെയ്തു.
അയ്യംകൊല്ലി താണികൊല്ലി സ്വദേശി ഓണന്റെ മകന്‍ മനു (24) നെ വെട്ടിക്കൊലപ്പെടുത്തിയ സംഭവത്തില്‍ പിതൃസഹോദരപുത്രന്‍ ചന്ദ്രന്‍ (46)ആണ് പിടിയിലായത്. ഇക്കഴിഞ്ഞ ചൊവ്വ വൈകിട്ട് നാലിനാണ് സംഭവം. മരംമുറി സംബന്ധമായി ഇരുവരും തമ്മിലുണ്ടായ വാക്കേറ്റമാണ് കൊലപാതകത്തില്‍ കലാശിച്ചത്. വാക്കേറ്റം മൂര്‍ച്ഛിച്ചതിനെത്തുടര്‍ന്ന് മനു ചന്ദ്രനെ മര്‍ദിക്കുകയായിരുന്നു. തുടര്‍ന്ന് ചന്ദ്രന്‍ കൈയിലുണ്ടായിരുന്ന കത്തികൊണ്ട് മനുവിന്റെ കഴുത്തിന് വെട്ടി.
മനു സംഭവസ്ഥലത്ത് വെച്ച് തന്നെ മരിച്ചു. കൃത്യം നടത്തിയതിന് ശേഷം ചന്ദ്രന്‍ അവിടെ നിന്ന് ഓടി രക്ഷപ്പെടുകയായിരുന്നു. സംഭവദിവസം ഫോണ്‍ കോള്‍ വന്നതിനെത്തുടര്‍ന്നാണ് മനു വീട്ടില്‍ നിന്ന് ഇറങ്ങിയത്. എന്നാല്‍ ഏറെ വൈകിയിട്ടും തിരിച്ചെത്താത്തതിനെ തുടര്‍ന്ന് നടത്തിയ അന്വേഷണത്തില്‍ വീടിന് സമീപത്തെ വനത്തില്‍ മരിച്ച നിലയില്‍ കണ്ടെത്തുകയായിരുന്നു. വന്യജീവി ആക്രമണത്തില്‍ കൊല്ലപ്പെട്ടതാണൊയിരുന്നു പ്രാഥമിക നിഗമനം.കോയമ്പത്തൂര്‍ മെഡിക്കല്‍ കോളജില്‍ നടത്തിയ പോസ്റ്റ്‌മോര്‍ട്ടത്തിലാണ് കൊലപാതകമാണെന്ന് തെളിഞ്ഞത്. തുടര്‍ന്ന് പൊലിസ് നടത്തിയ അന്വേഷണത്തിലാണ് ബന്ധുവായ ചന്ദ്രന്‍ പിടിയിലായത്. ദേവാല ഡി.വൈ.എസ്.പി ശിവകുമാറിന്റെ നേതൃത്വത്തിലുള്ള പൊലിസ് സംഘമാണ് പ്രതിയെ അറസ്റ്റ് ചെയ്തത്.