തേവലക്കര: മഴപെയ്ത് വെള്ളക്കെട്ടായ പ്രദേശങ്ങള്‍ വൃത്തിയാക്കി ചവറ അഗ്നിസുരക്ഷാ സേന. കഴിഞ്ഞയാഴ്ച പെയ്ത മഴയില്‍ വെള്ളം കയറിയ പ്രദേശങ്ങളിലാണ് അസിസ്റ്റന്റ് സ്റ്റേഷന്‍ ഓഫിസര്‍ ജി. പ്രസന്നകുമാറിന്റെ നേതൃത്വത്തിലുള്ള സംഘം ശുചീകരണ പ്രവര്‍ത്തനം നടത്തിയത്.
തേവലക്കര പാലയക്കല്‍ തെക്ക് പത്തൊന്‍പതാം വാര്‍ഡിലെ അങ്കണവാടി, അരിനല്ലൂര്‍ കെ.എ.പി കനാലിന്റെ പരിസരം ,കോയിവള പ്രദേശത്തെ വെള്ളക്കെട്ടിലായ ഇരുപത്തിയഞ്ചോളം വീടുകള്‍ എന്നിവയാണ് വൃത്തിയാക്കിയത്. പലയിടത്തും ചെളി നിറഞ്ഞ് കിടന്നിരുന്നതിനാല്‍ വീടുകളില്‍ താമസിക്കാന്‍ പോലും പറ്റാത്തവസ്ഥയിലായിരുന്നു. വലിയ പമ്പ് ഉപയോഗിച്ച് അണുനാശിനി ഉപയോഗിച്ച് വീടുകളും മറ്റും വൃത്തിയാക്കുകയായിരുന്നു. ശുചീകരണത്തിന് സേനാവിഭാഗങ്ങളായ ബിനുകുമാര്‍, നിഷാദ്, ടിജു തരകന്‍, കൃഷ്ണകുമാര്‍, അനീഷ് പ്ലാസിഡ് പങ്കാളികളായി.