തൃശൂര്‍: അന്താരാഷ്ട്ര വിപണിയില്‍ രണ്ടു കോടിയിലേറെ രൂപ വിലമതിക്കുന്ന 800 ഗ്രാം ഹാഷിഷ് ഓയിലും 240 ഗ്രാം ബ്രൗണ്‍ഷുഗറും തൃശൂര്‍ നഗരത്തില്‍ നിന്ന് എക്‌സൈസ് സ്‌പെഷല്‍ സ്‌ക്വാഡ് പിടികൂടി. തമിഴ്‌നാട്ടില്‍നിന്ന് കൊണ്ടുവന്നതെന്ന് കരുതുന്ന മയക്കുമരുന്ന് തൃശൂര്‍ റെയില്‍വേ സ്റ്റേഷനില്‍വച്ചാണ് എക്‌സൈസ് സംഘം പിടികൂടിയത്. മയക്കുമരുന്ന് കൊണ്ടുവന്നയാള്‍ എക്‌സൈസിനെ കണ്ട് ഓടി രക്ഷപ്പെട്ടു. 40 വയസ് പ്രായം തോന്നിക്കുന്ന പ്രതി കറുത്ത ടീഷര്‍ട്ടും നീല ജീന്‍സുമാണ് ധരിച്ചിരുന്നതെന്ന് സ്‌പെഷല്‍ സ്‌ക്വാഡ് സര്‍ക്കിള്‍ ഇന്‍സ്‌പെക്ടര്‍ വേലായുധന്‍ കുന്നത്ത് പറഞ്ഞു. ഫെവികോള്‍ പശയുടെ വലിയ ജാറില്‍ ഒളിപ്പിച്ചാണ് മയക്കുമരുന്ന് കൊണ്ടുവന്നത്. എക്‌സൈസ് ഇന്‍സ്‌പെക്ടര്‍മാരായ എസ്. ഷാജി, അജയകുമാര്‍, പ്രിവന്റീവ് ഓഫിസര്‍മാരായ പി.കെ ഉണ്ണികൃഷ്ണന്‍, റെനില്‍ രാജന്‍, ഗിരിധരന്‍, വിശാല്‍, കെ.എം വിനോദ്, എന്‍.ജി സുരേഷ്, സി.ബി സന്തോഷ്, വി.ബി ശ്രീജിത്ത് എന്നിവര്‍ സംഘത്തില്‍ ഉണ്ടായിരുന്നു.