ബംഗളൂരു: ഡിവില്ലിയേഴ്‌സിന്റെ വെടിക്കെട്ട് ബാറ്റിങ്ങില്‍ ബാംഗ്ലൂരിന് വിജയം. പഞ്ചാബിനെതിരേ 17 റണ്‍സിനാണ് ബാംഗ്ലൂരിന്റെ വിജയം. ആദ്യം ബാറ്റുചെയ്ത ബാംഗ്ലൂര്‍ നാല് വിക്കറ്റ് നഷ്ടത്തില്‍ 202 റണ്‍സ് എടുത്തപ്പോള്‍ പഞ്ചാബിന്റെ ഇന്നിങ്‌സ് നിശ്ചിത ഓവറില്‍ ഏഴുവിക്കറ്റ് നഷ്ടത്തില്‍ 185 റണ്‍സില്‍ അവസാനിച്ചു.

44 പന്തില്‍ നിന്ന് 82 റണ്‍സെടുത്ത ഡിവില്ലേഴ്‌സാണ് ബാംഗ്ലൂര്‍ നിരയില്‍ കത്തിക്കയറിയത്. പാര്‍ഥിവ് പട്ടേലിന്റെ വെടിക്കെട്ട് ബാറ്റിങും ബാംഗ്ലൂരിന്റെ സ്‌കോറില്‍ നിര്‍ണായകമായി.

മികച്ച തുടക്കത്തിനു ശേഷം വിരാട് കോഹ്‌ലിയെ (13) നഷ്ടമായപ്പോള്‍ 3.1 ഓവറില്‍ 35 റണ്‍സാണ് ബാംഗ്ലൂര്‍ നേടിയത്. രണ്ടാം വിക്കറ്റില്‍ 36 റണ്‍സ് കൂടി നേടിയ ശേഷം പാര്‍ഥിവിനെയും ബാംഗ്ലൂരിനു നഷ്ടമായി. 24 പന്തില്‍ നിന്ന് 43 റണ്‍സാണ് പാര്‍ഥിവ് പട്ടേല്‍ നേടിയത്. 71 റണ്‍സിന് ഒരു വിക്കറ്റ് എന്ന നിലയില്‍ നിന്ന് പൊടുന്നനെ 81 റണ്‍സിന് നാല് വിക്കറ്റ് എന്ന നിലയിലേക്ക് വീണ ശേഷം ഡി വില്ലിയേഴ്‌സും മാര്‍ക്കസ് സ്റ്റോയിനിസും ചേര്‍ന്നാണ് ബാംഗ്ലൂരിനെ 202 റണ്‍സിലേക്ക് എത്തിച്ചത്.
121 റണ്‍സാണ് അഞ്ചാം വിക്കറ്റില്‍ ഇരുവരും ചേര്‍ന്ന് നേടിയത്.

അവസാന ഓവറുകളില്‍ സിക്‌സുകളിലൂടെയായിരുന്നു ബാംഗ്ലൂരിന്റെ സ്‌കോറിങ്. 19ാം ഓവറില്‍ 21 റണ്‍സും 20ാം ഓവറില്‍ 27 റണ്‍സുമാണ് എബിഡി-സ്റ്റോയിനിസ് കൂട്ടുകെട്ട് നേടിയത്. ഒരു ഘട്ടത്തില്‍ 175 റണ്‍സ് നേടാനായാല്‍ ഭാഗ്യമെന്ന നിലയില്‍ എത്തിയ ശേഷമാണ് ബാംഗ്ലൂരിന്റെ വെടിക്കെട്ട് ബാറ്റിങ് പ്രകടനം.

മെല്ലെ തുടങ്ങിയ മാര്‍ക്കസ് സ്റ്റോയിനിസ് 34 പന്തില്‍ നിന്ന് 46 റണ്‍സ് നേടി ഇന്നിംങ്‌സ് മികച്ച രീതിയില്‍ അവസാനിപ്പിച്ചു.
പഞ്ചാബ് ബൗളര്‍മാരില്‍ രവി ചന്ദ്രന്‍ അശ്വിന്‍ മാത്രമാണ് തിളങ്ങിയത്. തന്റെ നാലോവറില്‍ ഒരു വിക്കറ്റ് നേടുവാന്‍ 15 റണ്‍സ് മാത്രമാണ് അശ്വിന്‍ വിട്ട് നല്‍കിയത്. മുരുഗന്‍ അശ്വിന്‍ 31 റണ്‍സ് വിട്ട് നല്‍കി ഒരു വിക്കറ്റ് നേടിയപ്പോള്‍ മുഹമ്മദ് ഷമി 53 റണ്‍സും ഹാര്‍ഡസ് വില്‍ജോയന്‍ 51 റണ്‍സുമാണ് വിട്ട് നല്‍കിയത്. പഞ്ചാബിന് വേണ്ടി നിക്കോളാസ് പൂരാന്‍ 46(28), രാഹുല്‍ 42(27), മായങ്ക് അഗര്‍വാള്‍ 35(21) എന്നിവര്‍ തിളങ്ങി.