ചങ്ങനാശ്ശേരി: റവന്യൂ ടവറില്‍ മൂന്നാം നിലയില്‍ പ്രവര്‍ത്തിക്കുന്ന താലൂക്കു ഓഫീസില്‍ വെള്ളിമൂങ്ങയെത്തി. ഇന്നലെ രാവിലെ ഓഫീസ് തുറന്നയുടനെ എവിടെനിന്നോ ഇത് പറന്നെത്തുകയായിരുന്നു.
പിന്നീട് മേശക്ക് അടിയിലേക്കു മാറി ഇരുട്ടില്‍ ഒളിച്ചു. വിവരം അറിഞ്ഞ് ഓഫീസ് ജീവനക്കാരും വിവിധ ഓഫീസില്‍ എത്തിയവരുമുള്‍പ്പെടെ നിരവധിപേര്‍ തടിച്ചുകൂടിയെങ്കിലും ആര്‍ക്കും മുഖംകൊടുക്കാന്‍ തയ്യാറാകാതെ ഇരുളില്‍ത്തന്നെയിരിപ്പായി മൂങ്ങ.
പിന്നീട് ഓഫീസ് അധികൃതര്‍ കോട്ടയം ഡിഎംഒയെ വിവരം അറിയിച്ചതനുസരിച്ച് ഡിഎംഒ ഓഫീസിലെ സ്‌പെഷ്യല്‍ ഇന്‍വെസ്റ്റിഗേഷന്‍ ടീം അംഗങ്ങളായ ജയന്‍, ജോസഫ്, മോഹനന്‍ അനില്‍ എന്നിവര്‍ സ്ഥലത്തെത്തി മേശക്കടിയില്‍ നിന്നും നീളന്‍ കമ്പുകൊണ്ടു മൂങ്ങെയെ പുറത്താക്കി പ്രത്യേകം ഒരുക്കിയ പ്ലാസ്റ്റിക കൂടിനുള്ളിലാക്കി കൊണ്ടുപോയി.
പ്രായപൂര്‍ത്തിയായതും അല്‍പം വലിപ്പം കൂടുതലുള്ളതുമാണ് ഈ വെള്ളിമൂങ്ങയെന്നു ഡിഎംഒ ഉദ്യോഗസ്ഥര്‍ പറഞ്ഞു.
രാത്രിയാകുന്നതോടെ ഇതിനെ തുറന്നുവിടുകയാണു ചെയ്യുന്നതെന്നും എന്നാല്‍ ഇതിന്റെ ഇണ സമീപത്ത് എവിടെയെങ്കിലും ഉണ്ടെങ്കില്‍ എത്രദൂരത്തുവിട്ടാലും തിരിച്ചുവരാനുള്ള സാധ്യതയേറെയാണെന്നും അവര്‍ പറഞ്ഞു.