തിരുവനന്തപുരം: സെക്രട്ടേറിയറ്റിലെ തീപിടിത്തവുമായി ബന്ധപ്പെട്ട് കൊവിഡ് മാനദണ്ഡങ്ങള്‍ ലംഘിച്ച് സമരം ചെയ്തതിന് യു.ഡി.എഫ് നേതാക്കളായ വി.എസ് ശിവകുമാര്‍ എം.എല്‍.എ, മാത്യു കുഴല്‍നാടന്‍, കെ.എസ്.യു സംസ്ഥാന പ്രസിഡന്റ് കെ.എം അഭിജിത്ത് തുടങ്ങിയവര്‍ക്കെതിരേ കന്റോണ്‍മെന്റ് പൊലിസ് കേസെടുത്തു.

നേതാക്കന്മാര്‍ക്ക് പുറമേ സമരം ചെയ്ത കണ്ടാലറിയാവുന്ന അന്‍പതു പേര്‍, ഇന്നലെ സെക്രട്ടേറിയറ്റിന് മുന്നില്‍ സമരം ചെയ്ത യു.ഡി.എഫ്, യൂത്ത് കോണ്‍ഗ്രസ്, മുസ്‌ലിം ലീഗ്, യൂത്ത് ലീഗ്, ബി.ജെ.പി, യുവമോര്‍ച്ച, പട്ടികജാതി മോര്‍ച്ച എന്നീ സംഘടനകള്‍ക്കെതിരേയും പകര്‍ച്ചവ്യാധി നിയന്ത്രണ നിയമപ്രകാരം കേസെടുത്തിട്ടുണ്ട്.
മാസ്‌ക് ധരിക്കാതെ പുറത്തിറങ്ങിയ 9,978 പേര്‍ക്കെതിരേ ഇന്നലെ സംസ്ഥാനത്ത് കേസെടുത്തു. ക്വാറന്റൈന്‍ ലംഘിച്ച ഒന്‍പത് പേര്‍ക്കെതിരേയും ലോക്ക്ഡൗണ്‍ നിയന്ത്രണങ്ങള്‍ ലംഘിച്ച 2,443 പേര്‍ക്കെതിരേയും കേസെടുത്തിട്ടുണ്ട്. ആകെ 995 പേരെ അറസ്റ്റ് ചെയ്തു. 114 വാഹനങ്ങള്‍ പിടിച്ചെടുക്കുകയും ചെയ്തതായും അധികൃതര്‍ അറിയിച്ചു.