തിരുവനന്തപുരം: ദുരിതാശ്വാസ ക്യാംപുകള്‍ കുറച്ചു ദിവസം കൂടി തുടരേണ്ടിവരുമെന്ന് മുഖ്യമന്ത്രി. ഇന്നലെ വൈകിട്ട് നടന്ന പ്രളയക്കെടുതി ദുരിതാശ്വാസ, പുനരധിവാസ പ്രവര്‍ത്തനങ്ങളുടെ അവലോകനയോഗത്തിനു ശേഷമാണ് മുഖ്യമന്ത്രി പിണറായി വിജയന്‍ ഇക്കാര്യം അറിയിച്ചത്.
ആളുകള്‍ വീടുകളിലേക്ക് മടങ്ങുന്നുണ്ട്. ക്യാംപുകളില്‍ ഭക്ഷണം നല്‍കാന്‍ ആവശ്യമായ സാധനങ്ങള്‍ സ്റ്റോക്കുണ്ട്. പ്രളയ ദുരിതബാധിതര്‍ക്കുള്ള ആദ്യസഹായമായ 10000 രൂപ ഉടന്‍ കൈമാറണമെന്ന് കലക്ടര്‍മാര്‍ക്ക് നിര്‍ദേശം നല്‍കിയതായും മുഖ്യമന്ത്രി അറിയിച്ചു. നിലവില്‍ 1,093 ക്യാംപുകളിലായി 3,42,699 പേരുണ്ട്. ഈ മാസം എട്ട് മുതല്‍ ഇന്നലെ വരെ 322 പേര്‍ മരിച്ചു.
അവലോകന യോഗത്തില്‍ ചീഫ് സെക്രട്ടറി ടോം ജോസ്, പൊലിസ് മേധാവി ലോക്‌നാഥ് ബെഹ്‌റ, ആഭ്യന്തര അഡിഷനല്‍ ചീഫ് സെക്രട്ടറി സുബ്രതോ ബിശ്വാസ്, ആരോഗ്യ അഡിഷനല്‍ ചീഫ് സെക്രട്ടറി രാജീവ് സദാനന്ദന്‍, നിയമ സെക്രട്ടറി ബി.ജി ഹരീന്ദ്രനാഥ്, ഫയര്‍ഫോഴ്‌സ് മേധാവി എ. ഹേമചന്ദ്രന്‍, ഡോ. ബീന, ഡോ. വി. വേണു, കെ.എസ്.ഇ.ബി ചെയര്‍മാന്‍ എന്‍.എസ് പിള്ള, ഡോ. ഇളങ്കോവന്‍, നളിനി നെറ്റോ, വി.എസ് സെന്തില്‍, എം. ശിവശങ്കര്‍, എ.ഡി.ജി.പി വിനോദ്കുമാര്‍ പങ്കെടുത്തു.