വൈത്തിരി: വൈത്തിരിക്ക് സമീപം റോഡരികില്‍ 80 ചാക്കോളം കോഴിമാലിന്യ തള്ളി. ചുണ്ടേല്‍-വൈത്തിരി റോഡില്‍ അമ്മാറ ജംഗ്ഷന് സമീപമാണ് ഇന്നലെ രാത്രിയില്‍ സമൂഹിക വിരുദ്ധര്‍ കോഴിമാലിന്യം തള്ളിയത്.
അതീവദുര്‍ഗന്ധം വമിക്കുന്ന മാലിന്യം പ്രദേശവാസികള്‍ക്കും, യാത്രക്കാര്‍ക്കും ഒരുപോലെ ബുദ്ധിമുട്ടായി. വൈത്തിരി പഞ്ചായത്ത് അധികൃതര്‍ സ്ഥലത്തെത്തി മാലിന്യം കുഴിച്ചുമൂടാനുള്ള നടപടികള്‍ സ്വീകരിച്ചിട്ടുണ്ട്.
കഴിഞ്ഞയാഴ്ചയും ഇതേസ്ഥലത്ത് ചാക്ക് കണക്കിന് മാലിന്യം കൊണ്ടുവന്ന് തള്ളിയിരുന്നു. ഇത്തരത്തില്‍ കോഴിമാലിന്യം തള്ളുന്ന സാമൂഹിക വിരുദ്ധരെ പിടികൂടി തക്കതായ ശിക്ഷ നല്‍കണമെന്നാണ് പ്രദേശത്തുകാര്‍ ആവശ്യപ്പെടുന്നത്. രാത്രിയുടെ മറവില്‍ ചെയ്യുന്ന ഇത്തരം പ്രവര്‍ത്തികള്‍ അവസാനിപ്പിച്ചില്ലെങ്കില്‍ നാട്ടുകാര്‍ സംഘടിച്ച് ഇത്തരക്കാരെ പിടികൂടുമെന്നും പ്രദേശവാസികള്‍ പറഞ്ഞു.
പോക്കറ്റ് റോഡായതിനാല്‍ ഇതിലൂടെ രാത്രികാലങ്ങളില്‍ വാഹനങ്ങളോ യാത്രക്കാരോ ഉണ്ടാകാറില്ല.
ഇത് മുതലെടുത്താണ് ചിലര്‍ ഇത്തരത്തിലുള്ള പ്രവൃത്തികള്‍ ചെയ്യുന്നത്. ഇനിയും ഇത്തരത്തിലുള്ള സംഭവങ്ങളുണ്ടായാല്‍ പ്രത്യക്ഷ സമരങ്ങളിലേക്ക് ഇറങ്ങാനാണ് നാട്ടുകാരുടെ തീരുമാനം. ദിനേന നിരവധിയാളുകള്‍ യാത്ര ചെയ്യുന്ന റോഡാണിത്.