തിരുവനന്തപുരം: സായുധ സേനയിലെ അസിസ്റ്റന്റ് കമാന്‍ഡന്റുമാരുടെ നിയമനത്തില്‍ ഡി.ജി.പിയെ തിരുത്തി ആഭ്യന്തര വകുപ്പിന്റെ ഉത്തരവ്. സര്‍വിസ് ചട്ടങ്ങള്‍ ലംഘിച്ച് ഡി.ജി.പി ലോക്‌നാഥ് ബെഹ്‌റ നിയമനം നടത്തിയെന്നു കണ്ടെത്തിയതിനെ തുടര്‍ന്നാണ് നടപടി. വര്‍ക്ക് അറേഞ്ച്‌മെന്റിന്റെ ഭാഗമായി ഡി.ജി.പി നടത്തിയ അഞ്ചു പേരുടെ നിയമനങ്ങള്‍ ആഭ്യന്തര വകുപ്പ് റദ്ദാക്കുകയും ചെയ്തു.
സായുധ സേനയിലെ അഞ്ച് ഇന്‍സ്‌പെക്ടര്‍മാര്‍ക്ക് അസിസ്റ്റന്റ് കമാന്‍ഡന്റുമാരായി സര്‍ക്കാര്‍ ഈയിടെ സ്ഥാനക്കയറ്റം നല്‍കിയിരുന്നു. ഭരണപരമായ ആവശ്യങ്ങള്‍ പരിഗണിച്ച് വിവിധ ബറ്റാലിയനുകളിലേക്ക് ഇവരെ നിയമിക്കുകയും ചെയ്തു. എന്നാല്‍ വര്‍ക്ക് അറേഞ്ച്‌മെന്റിന്റെ പേരിലും ഉദ്യോഗസ്ഥരുടെ സൗകര്യവും കണക്കിലെടുത്തും അഞ്ചു പേരെയും ബെഹ്‌റ മാറ്റി നിയമിച്ചു. കഴിഞ്ഞ മാസം 27നായിരുന്നു ഇതുസംബന്ധിച്ച ഉത്തരവ് പുറത്തിറക്കിയത്.
ഈ നടപടിക്കെതിരേയാണ് ആഭ്യന്തര വകുപ്പ് രംഗത്തെത്തിയത്. സര്‍വിസ് റൂളിലെ 32 ബി വകുപ്പ് പ്രകാരം അസിസ്റ്റന്റ് കമാന്‍ഡന്റുമാരുടെ നിയമനം സര്‍ക്കാരിന്റെ അധികാരമാണ്. ഇതു വകവയ്ക്കാതെയാണ് ഉദ്യോഗസ്ഥരെ ഡി.ജി.പി വിവിധ സ്ഥലങ്ങളില്‍ നിയമിച്ചതെന്നാണ് ആഭ്യന്തര വകുപ്പിന്റെ തിരുത്ത്. കുട്ടിക്കാനത്തേക്ക് സര്‍ക്കാര്‍ പോസ്റ്റിങ് നല്‍കിയ എസ്. സിജുവിനെ തിരുവനന്തപുരത്തും മലപ്പുറം ആര്‍.ആര്‍.ആര്‍.എഫിലേക്ക് നിയമിച്ച സുരേഷിനെ മലപ്പുറം തീവ്രവാദ വിരുദ്ധ സ്‌ക്വാഡിലേക്കും രാജു എബ്രഹാമിനെ തൃശൂരില്‍ നിന്ന് അടൂരിലേക്കും സുജിത്തിനെ തിരുവനന്തപുരം എസ്.എ.പി ക്യാംപില്‍ നിന്ന് വനിതാ ബറ്റാലിയനിലും അജയകുമാറിനെ കൊച്ചിയില്‍ നിന്ന് തിരുവനന്തപുരത്തേക്കുമാണ് ഡി.ജി.പി നിയമിച്ചത്. ഡി.ജി.പിയുടെ ഉത്തരവ് ആഭ്യന്തര വകുപ്പ് റദ്ദാക്കി.
സര്‍ക്കാര്‍ നിയമിച്ച സ്ഥലങ്ങളിലേക്കു തന്നെ ഉദ്യോഗസ്ഥര്‍ മടങ്ങാനും അഞ്ചു ദിവസത്തിനകം ഇക്കാര്യത്തില്‍ ഡി.ജി.പി റിപ്പോര്‍ട്ട് നല്‍കാനും ആഭ്യന്തര വകുപ്പ് നിര്‍ദേശിച്ചിട്ടുണ്ട്.