ശ്രീനഗര്‍: ജമ്മു കശ്മിരില്‍ രണ്ടിടങ്ങളിലായി നടന്ന ഏറ്റുമുട്ടലില്‍ ആറു തീവ്രവാദികളും ഒരു സൈനികനും കൊല്ലപ്പെട്ടെന്ന് സൈന്യം. ഒരു തീവ്രവാദി കീഴടങ്ങിയതായും സൈന്യം വ്യക്തമാക്കുന്നു. ഇന്നലെയും കഴിഞ്ഞ ദിവസവുമായി പുല്‍വാമയിലും ഷോപ്പിയാനിലുമായിരുന്നു ഏറ്റുമുട്ടലുകള്‍ നടന്നത്.
ഇന്നലെ പുല്‍വാമയില്‍ നടന്ന ഏറ്റുമുട്ടലിലാണ് മൂന്നു തീവ്രവാദികള്‍ കൊല്ലപ്പെട്ടത്. ഇവിടെ ഒരു സൈനികനും കൊല്ലപ്പെട്ടു. പ്രദേശത്ത് സൈന്യം തിരച്ചില്‍ നടത്തുന്നുണ്ട്. കൊല്ലപ്പെട്ടവരില്‍നിന്ന് തോക്കുകള്‍ അടക്കമുള്ള ആയുധങ്ങള്‍ കണ്ടെടുത്തിട്ടുണ്ടെന്നും സൈന്യം വ്യക്തമാക്കുന്നു. ഷോപ്പിയാനില്‍ കഴിഞ്ഞ ദിവസം നടന്ന ഏറ്റുമുട്ടലില്‍ മൂന്നു തീവ്രവാദികള്‍ കൊല്ലപ്പെട്ടിരുന്നു. മറ്റൊരാളെ ജീവനോടെ പിടികൂടുകയും ചെയ്തിട്ടുണ്ടെന്നാണ് വിവരം. 24 മണിക്കൂറിനിടെ കശ്മിരില്‍ ആറു തീവ്രവാദികള്‍ കൊല്ലപ്പെട്ടെന്നാണ് സൈന്യം അവകാശപ്പെടുന്നത്.

അതിര്‍ത്തിയില്‍ തുരങ്കം കണ്ടെത്തി

ശ്രീനഗര്‍: ജമ്മു കശ്മിരിലെ അതിര്‍ത്തിയില്‍ തുരങ്കം കണ്ടെത്തിയെന്നു സൈന്യം. സാംബ ജില്ലയിലെ ബംഗലാദ് പ്രദേശത്താണ് 150 മീറ്റര്‍ നീളവും ഇരുപത്തിയഞ്ചടി വീതിയുമുള്ള തുരങ്കം കണ്ടെത്തിയതെന്നു ബി.എസ്.എഫ് വ്യക്തമാക്കി. ഇതില്‍ പലയിടത്തും മണല്‍ചാക്കുകള്‍ വച്ച് അടയാളം രേഖപ്പെടുത്തിവച്ചിരുന്നെന്നും സൈന്യം വ്യക്തമാക്കി.
സംഭവത്തെ തുടര്‍ന്ന് പ്രദേശത്തു വ്യാപക തിരച്ചില്‍ നടക്കുകയാണ്. പാക് അതിര്‍ത്തിയോട് ചേര്‍ന്ന പ്രദേശത്താണ് ഇതു കണ്ടെത്തിയതെന്നാണ് സൈന്യം വ്യക്തമാക്കുന്നത്.