ജിദ്ദ: പ്രകൃതി വിഭവങ്ങളുടെ ക്രമം വിട്ട ചൂഷണത്തിനും പാരിസ്ഥിതിക സംരക്ഷണത്തിനുമായി ഒരു പ്രത്യേക പൊലിസ് സേനയ്ക്ക് രൂപം നല്‍കാനുള്ള ശ്രമത്തിലാണ് സഊദി പരിസ്ഥിതി മന്ത്രാലയം. പ്രകൃതി വിഭവങ്ങളുടെ മേലുള്ള മനുഷ്യന്റെ കുറ്റകരമായ കൈയേറ്റങ്ങള്‍ക്ക് തടയിടാന്‍ ഉദ്യോഗസ്ഥ തലത്തിലെന്നതിലുപരി സായുധമായ പ്രത്യക്ഷ നടപടികളാണ് ഇതിലൂടെ ഉദ്യേശിക്കുന്നതു. സഊദി പരിസ്ഥിതി സംരക്ഷണ അതോറിട്ടിയയുടെ നിര്‍ദ്ധിഷ്ട നീക്കം സഫലമായാല്‍ ലോകത്തിലെ ഇത്തരത്തിലുള്ള ആദ്യ സായുധ വിഭാഗമായിരിക്കും സഊദിയില്‍ നിലവില്‍ വരിക.
പ്രകൃതി വിഭവങ്ങളുടെ മേലുള്ള കൈയേറ്റങ്ങള്‍ക്കെതിരെ വിപുലമായ അധികാരങ്ങളോട് കൂടിയുള്ള 'പരിസ്ഥിതി പോലീസ്' ഏറെ വൈകാതെ തന്നെ പിറവി കൊല്ലുമെന്നാണ് നിലവിലെ സൂചനകള്‍. പരിസ്ഥിതി സംരക്ഷണത്തിനായി നിലവിലുള്ള നിയമങ്ങള്‍ ലംഘിക്കുന്നവരെ കയ്യോടെ പിടികൂടാന്‍ ഇതിനായുള്ള സവിശേഷ സേനാ വിഭാഗം ഉണ്ടാകുന്നതോടെ സാധിക്കുമെന്നാണ് പ്രതീക്ഷ. പരിസ്ഥിതി വകുപ്പിന്റെ പരിശോധകരെ സഹായിക്കാനും നിയമലംഘകരെ അറസ്റ്റ് ചെയ്യാനും ഇതുപകരിക്കും. നിയമ ലംഘകര്‍ക്കു തടവിന് പുറമെ അമ്പതു ലക്ഷം വരെ റിയാല്‍ പിഴയും ശിക്ഷയായി നിര്‍ദേശിക്കപ്പെടുന്നുണ്ട്.
ഫാക്ടറികള്‍, മറ്റു സ്ഥാപനങ്ങള്‍, വിനോദ കേന്ദ്രങ്ങള്‍, കടല്‍ തീരങ്ങള്‍, വനമേഖലകള്‍, സംരക്ഷിത കേന്ദ്രങ്ങള്‍ തുടങ്ങിയവയെല്ലാം പുതിയ സേനാ വിഭാഗത്തിന്റെ പരിധിയില്‍ പെടും. 2017 നവംബറില്‍ സഊദിയില്‍ 'രാജകീയ സംരക്ഷിത സമിതികള്‍' സംബന്ധിച്ച പ്രഖ്യാപനം വന്നതിനോടനുബന്ധിച്ചാണ് 'പരിസ്ഥിതി പോലീസ്' രൂപവത്കരണ പഠനം ആരംഭിച്ചത്.