ഇരവിപുരം: വാഴക്കുല കയറ്റി വരികയായിരുന്ന മിനിലോറി നിയന്ത്രണം വിട്ട് ദേശീയപാതയില്‍ മറിഞ്ഞു. ലോറിയിലുണ്ടായിരുന്ന ഡ്രൈവറും മറ്റൊരാളും പരുക്കേല്‍ക്കാതെ രക്ഷപെട്ടു.
ഇന്നലെ രാവിലെ ആറരയോടെ തട്ടാമല പള്ളിക്കും മേവറത്തിനും ഇടയിലായിരുന്നു അപകടം. തമിഴ്‌നാട്ടിലെ തക്കലയില്‍ നിന്നും കൊല്ലം ഭാഗത്തേക്ക് പോകുകയായിരുന്ന ലോറി നിയന്ത്രണം വിട്ട് മറിയുകയായിരുന്നു.
ലോറി മറിഞ്ഞതിനെ തുടര്‍ന്ന് ലോറിയിലുണ്ടായിരുന്ന വാഴക്കുല റോഡിലാകെ ചിതറി കിടന്നതിനാല്‍ ഏറെ നേരം ഗതാഗതവും മുടങ്ങി.
പൊലിസിന്റെ റിക്കവറി വാനെത്തിയാണ് ലോറി പാതയില്‍ നിന്നും നീക്കം ചെയ്തത്. ലോറിയുടെ ഓയില്‍ റോഡില്‍ പടര്‍ന്നത് ഫയര്‍ഫോഴ്‌സെത്തി നീക്കം ചെയ്തു. ലോറി ഡ്രൈവര്‍ കളിയിക്കാവിള സ്വദേശി അലി അക്ബറാണ് പരുക്കേല്‍ക്കാതെ രക്ഷപെട്ടത്.