കാസര്‍കോട്: അതിവേഗപാതയടക്കമുള്ള വിഷയങ്ങളില്‍ കാസര്‍കോടിനോട് കാണിക്കുന്ന അവഗണനയില്‍ ജനപ്രതിനിധികളും രാഷ്ട്രീയപാര്‍ട്ടി നേതാക്കളുമടക്കമുള്ളവര്‍ ഒറ്റക്കെട്ടായി രംഗത്ത്. നവമാധ്യമങ്ങളിലൂടെ തുടക്കമിടുകയും അലയടിക്കുകയും ചെയ്ത പ്രതിഷേധം ഇപ്പോള്‍ കാസര്‍കോട് ജില്ല മുഴുവന്‍ പ്രതിഷേധക്കടലായി ഇരമ്പുകയാണ്. എം.പി പി കരുണാകരനടക്കമുള്ളവര്‍ സംഭവത്തില്‍ നിലപാട് കടുപ്പിച്ചിരിക്കുന്നു. സംസ്ഥാന സര്‍ക്കാരിന്റെ തീരുമാനത്തില്‍ യോജിപ്പില്ലെന്ന് അദ്ദേഹം തറപ്പിച്ചു പറഞ്ഞു. ജില്ലയോടുള്ള റെയില്‍ അവഗണന ഇന്നും ഇന്നലെയും തുടങ്ങിയതല്ലെന്നും അദ്ദേഹം ആരോപിച്ചു. കേരളം മാറുമ്പോള്‍ കാസര്‍കോടും മാറണമെന്ന അഭിപ്രായമാണ് തനിക്കെന്നും പി കരുണാകരന്‍ കൂട്ടിച്ചേര്‍ത്തു. മന്ത്രി ഇ ചന്ദ്രശേഖരനും എം.പി പി കരുണാകരനും മുഖ്യമന്ത്രിയെ സംഭവത്തിന്റെ ഗൗരവം അറിയിച്ചു. മുസ്‌ലിം ലീഗ് എം.എല്‍മാരായ എന്‍.എ നെല്ലിക്കുന്നും പി.ബി അബ്ദു റസാഖും മുഖ്യമന്ത്രിയെ കാണാനും തീരുമാനിച്ചിട്ടുണ്ട്.
അതേസമയം, തിരുവനന്തപുരം-കാസര്‍കോട് അതിവേഗ റെയില്‍ പാത പദ്ധതിയില്‍ നിന്നു കാസര്‍കോടിനെ മുറിച്ചുമാറ്റിയത് ഉദ്യോഗസ്ഥ ലോബിയാണെന്ന് സംശയവും ബലപ്പെടുന്നുണ്ട്. സ്വപ്ന പദ്ധതിയുടെ ആവിഷ്‌കാരം നടത്തിയത് ഡി.എം.ആര്‍ സി മുന്‍ ചെയര്‍മാന്‍ ഇ ശ്രീധരനായിരുന്നു. അദ്ദേഹത്തിന്റെ പദ്ധതി കാസര്‍കോടു വരെയായിരുന്നു. 2010 ലെ ഇടതുമുന്നണി സര്‍ക്കാറാണു പദ്ധതിയെ കുറിച്ച് പഠനം നടത്താന്‍ നിര്‍ദേശം നല്‍കിയത്. പിന്നീടു വന്ന യു.ഡി.എഫ് സര്‍ക്കാര്‍ പഠനവുമായി മുന്നോട്ടു പോയി. ചുമതല ഡി.എം.ആര്‍.സിക്കും ഏകോപനം കേരളാ സ്‌റ്റേറ്റ് ഇന്‍ഡസ്ട്രിയല്‍ ഡെവലപ്പ്‌മെന്റ് കോര്‍പറേഷനുമായിരുന്നു.
ജനങ്ങളുടെ പ്രതികരണവും സ്ഥലമെടുപ്പിലെ പ്രശ്‌നവും ഭയന്നു പദ്ധതി മൂന്നു വര്‍ഷം ഫ്രീസറില്‍ കിടന്നു. 2015 ല്‍ ഡി.എം.ആര്‍.സി കരട് റിപ്പോര്‍ട്ടു നല്‍കിയെങ്കിലും പൊടിതട്ടിയെടുത്തത് ഇപ്പോഴാണ്.
പുതിയ ഇടതു സര്‍ക്കാര്‍ അധികാരത്തില്‍ വന്നതോടെയാണ് പദ്ധതി നടപ്പാക്കാന്‍ തീരുമാനിച്ചത്. കരടു റിപ്പോര്‍ട്ടിലാണ് തിരുവനന്തപുരം-കണ്ണൂര്‍ റെയില്‍പാതയെ കുറിച്ച് പരാമര്‍ശമുള്ളത്. കാസര്‍കോടിനെ കുറിച്ച് അതിലൊന്നും പറയുന്നില്ല. ഇതെങ്ങനെ സംഭവിച്ചുവെന്നതിനെ കുറിച്ച് ആര്‍ക്കും ഒരുത്തരവുമില്ല.
ഉദ്യോഗസ്ഥ ലോബിയുടെ ഇടപെടലാണ് കാസര്‍കോടിനെ മുറിച്ചുമാറ്റാന്‍ കാരണമെന്നാണ് അണിയറയിലെ സംസാരമെങ്കിലും ഉദ്യോഗസ്ഥ ലോബിക്കെതിരേ നികത്താന്‍ തെളിവുകളില്ല. ബജറ്റില്‍ സര്‍വേക്കായി 50 ലക്ഷം രൂപ നീക്കിവച്ചിട്ടുണ്ട്. 2017 ല്‍ പണി തുടങ്ങുന്ന രീതിയിലാണ് ഡി.എം.ആര്‍.സിക്കു നല്‍കിയ നിര്‍ദേശം.
അതിലും കണ്ണൂര്‍ വരെയാണോയെന്നതില്‍ വ്യക്തതയില്ല. നിര്‍മാണത്തിനുള്ള ചെലവും പദ്ധതി പ്രാവര്‍ത്തികമായാലുള്ള വരവും കണക്കിലെടുത്താല്‍ കാസര്‍കോടേക്ക് പദ്ധതി നീട്ടിയാല്‍ ലാഭം പ്രതീക്ഷിക്കേണ്ടതില്ലെന്ന ഉദ്യേഗസ്ഥ മുന്‍വിധിയാണു കാസര്‍കോടിനു വിനയായതെന്നാണ് രാഷ്ട്രീയ നേതാക്കളടക്കമുള്ളവരുടെ സംസാരം.