മലപ്പുറം: സി.പി.ഐയും മുസ്‌ലിം ലീഗും തമ്മില്‍ വലിയ വ്യത്യാസമില്ലെന്ന് പൊന്നാനിയിലെ എല്‍.ഡി.എഫ് സ്ഥാനാര്‍ഥി പി.വി അന്‍വര്‍.
സ്വകാര്യ ചാനലിന് നല്‍കിയ അഭിമുഖത്തിലാണ് അന്‍വര്‍ സി.പി.ഐക്കെതിരേ രംഗത്തുവന്നത്. സി.പി.ഐ ഇപ്പോഴും തന്നെ ഉപദ്രവിക്കുകയാണ്. കഴിയാവുന്നവിധത്തിലെല്ലാം തന്നെ ഉപദ്രവിച്ചിട്ടുണ്ട്.
റവന്യൂ, വനംവകുപ്പുകള്‍ തന്റെ ബിസിനസ് സംരംഭങ്ങള്‍ക്കെതിരേ നേരത്തേ സര്‍ക്കാരിന് റിപ്പോര്‍ട്ട് നല്‍കിയിരുന്നു. ഈ രണ്ടു വകുപ്പും സി.പി.ഐയുടെ കൈകളിലാണുള്ളത്.
മലപ്പുറത്ത് സി.പി.ഐക്ക് താല്‍പര്യം ലീഗിനോടാണെന്നും അദ്ദേഹം പറഞ്ഞു. അതേസമയം, പൊന്നാനിയിലും മലപ്പുറത്തും യു.ഡി.എഫ് മികച്ച വിജയം നേടുമെന്ന് സി.പി.എം മലപ്പുറം ജില്ലാ കമ്മിറ്റിയുടേതെന്ന പേരില്‍ റിപ്പോര്‍ട്ട് പുറത്തുവന്നു. മലപ്പുറത്ത് പി.കെ കുഞ്ഞാലിക്കുട്ടി 1,68,000 വോട്ടുകള്‍ക്കും പൊന്നാനിയില്‍ ഇ.ടി മുഹമ്മദ് ബഷീര്‍ 35,000 വോട്ടുകള്‍ക്കും വിജയിക്കുമെന്നാണ് സി.പി.എം വിലയിരുത്തിയത്.
വോട്ടെടുപ്പിനുശേഷം ബൂത്ത് കമ്മിറ്റികളില്‍ നിന്ന് വിവരങ്ങള്‍ ശേഖരിച്ചാണ് റിപ്പോര്‍ട്ട് തയാറാക്കിയത്. എന്നാല്‍, പാര്‍ട്ടി ഇത്തരം റിപ്പോര്‍ട്ട് നല്‍കിയിട്ടില്ലെന്നും ഭവനാസൃഷ്ടി മാത്രമാണെന്നുമാണ് ജില്ലാ ഘടകത്തിന്റെ വിശദീകരണം.