ലണ്ടന്‍: എന്ത് വിലകൊടുത്തും ജയിക്കാമെന്ന് വിചാരിച്ചിരുന്ന മത്സരത്തില്‍ സമനില പിണഞ്ഞതോടെ മാഞ്ചസ്റ്റര്‍ യുനൈറ്റഡിന്റെ ചാംപ്യന്‍സ് ലീഗ് പ്രതീക്ഷകള്‍ തുലാസിലായി. കഴിഞ്ഞ ദിവസം ഇംഗ്ലീഷ് പ്രീമിയര്‍ ലീഗില്‍ ചെല്‍സിക്കെതിരേ 1-1 ന്റെ സമനില വഴങ്ങിയതോടെയാണ് യുനൈറ്റഡ് പ്രതിരോധത്തിലായത്. പ്രീമിയര്‍ ലീഗില്‍ ആരൊക്കെയാണ് ആദ്യ നാലില്‍ എന്നത് ദിവസവും മാറി മറിഞ്ഞുകൊണ്ടിരിക്കുകയാണ്. ഇതിനിടെയാണ് ഇനിയുള്ള മത്സരങ്ങളെങ്കിലും ജയിച്ച് ആദ്യ നാലിലെത്താനുള്ള അവസരം യുനൈറ്റഡിന് നഷ്ടമായത്.

ആഴ്‌സനലും ടോട്ടന്‍ഹാമും തോറ്റതോടെയായിരുന്നു ടോപ് ഫോറില്‍ കടക്കാമെന്ന യുനൈറ്റഡിന്റെ പ്രതീക്ഷകള്‍ക്ക് ചിറക് മുളച്ചത്. മികച്ച പ്രകടനം പുറത്തെടുത്ത മാഞ്ചസ്റ്റര്‍ യുനൈറ്റഡിന് തിരിച്ചടിയായത് ഡിഹിയയുടെ അബദ്ധമായിരുന്നു. മോശം ഫോമില്‍ ആയിരുന്ന മാഞ്ചസ്റ്റര്‍ യുനൈറ്റഡ് മികച്ച രീതിയിലാണ് തുടങ്ങിയത്. ചെല്‍സിയെ വട്ടം കറക്കിയ തുടക്കത്തിന് ശേഷം മാട്ടയിലൂടെ മാഞ്ചസ്റ്റര്‍ യുനൈറ്റഡ് ലീഡ് എടുത്തു. ലൂക് ഷോയുടെ പാസില്‍നിന്നായിരുന്നു മാട്ടയുടെ ഗോള്‍. മത്സരത്തില്‍ ചെല്‍സി ഒരിക്കലും തിരിച്ചുവരില്ല എന്ന് തോന്നിയിരുന്നു എങ്കിലും ഡിഹിയയുടെ അബദ്ധമാണ് ചെല്‍സിക്ക് തുണയായത്. ഗോള്‍ പിറന്നതോടെ നിയന്ത്രണം നഷ്ടപ്പെട്ട യുനൈറ്റഡിന് തൊട്ടതെല്ലാം പിഴച്ചു. ഈ സമനിലയോടെ ആദ്യ നാലില്‍ എത്തുക എന്നത് മാഞ്ചസ്റ്റര്‍ യുനൈറ്റഡിന് അസാധ്യമായി.