മണ്ണാര്‍ക്കാട്: കേരള മുസ്‌ലിംകള്‍ക്ക് ഒന്‍പത് പതിറ്റാണ്ടിലധികമായി മത സാമൂഹിക-സാംസ്‌കാരിക വൈജ്ഞാനിക മേഖലകളില്‍ നേതൃത്വം നല്‍കിവരുന്ന സമസ്ത കേരള ജംഇയ്യത്തുല്‍ ഉലമയുടെ വിദ്യാര്‍ത്ഥി പ്രസ്ഥാനമായ എസ്.കെ.എസ്.എസ്.എഫിന്റെ പാലക്കാട് ജില്ലാ സമ്മേളനം 2017 ഫെബ്രുവരി അവസാന വാരത്തില്‍ മണ്ണാര്‍ക്കാട് വെച്ച് നടത്താന്‍ ചെര്‍പ്പുളശ്ശേരിയില്‍ വെച്ചു ചേര്‍ന്ന ജില്ലാ സെക്രട്ടറിയേറ്റില്‍ തീരുമാനിച്ചു. സമ്മേളനത്തിന് മുന്നോടിയായി ജില്ലയിലെ മുഴുവന്‍ മേഖല -ക്ലസ്റ്റര്‍ ഭാരവാഹികളെ പങ്കെടുപ്പിച്ചുകൊണ്ട് ലീഡേഴ്‌സ് മീറ്റ് സെപ്തംബര്‍ മൂന്നാം തിയ്യതി ശനിയാഴ്ച രാവിലെ ഒന്‍പതു മണിമുതല്‍ വൈകുന്നേരം നാലു മണിവരെ മണ്ണാര്‍ക്കാട് ഇസ്‌ലാമിക് സെന്ററിലും വിഖായ ജില്ലാ ട്രൈനിംഗ് ക്യാംപ് ഓഗസ്റ്റ് ഒന്‍പതാം തിയ്യതി തൃത്താലയിലും നടക്കും. സമ്മേളനത്തിന്റെ ഭാഗമായി ജീവകാരുണ്യ മേഖലയിലെ സംഘടനയുടെ വിങ്ങായ സഹചാരിയുടെ സെന്ററുകള്‍ എല്ലാ ക്ലസ്റ്ററുകളിലും ആരംഭിക്കും. ഇത് സംബന്ധമായി ചേര്‍ന്ന യോഗത്തില്‍ ജില്ലാ പ്രസിഡന്റ് സയ്യിദ് ശിഹാബുദ്ധീന്‍ തങ്ങള്‍ വല്ലപ്പുഴ അധ്യക്ഷനായി. ജില്ലാ വൈസ് പ്രസിഡന്റ് സയ്യിദ് ഫാറൂഖ് തങ്ങള്‍ ഇരുമ്പകശ്ശേരി യോഗം ഉദ്ഘാടനം ചെയ്തു. ആരിഫ് ഫൈസി തിരുവേഗപ്പുറ, ടി.കെ സുബൈര്‍ മൗലവി പുല്ലിശ്ശേരി, പി.എ റഹീം ഫൈസി അക്കിപ്പാടം, ഇബ്‌റാഹീം ഫൈസി പരുതൂര്‍, സലാം അഷ്‌റഫി വിളത്തൂര്‍, ഹിബത്തുള്ള മാസ്റ്റര്‍ മാരായമംഗലം, ശമീര്‍ മാസ്റ്റര്‍ തെയ്യോട്ടുച്ചിറ, നിഷാദ് പട്ടാമ്പി എന്നിവര്‍ സംബന്ധിച്ചു. ജില്ലാ ജനറല്‍ സെക്രട്ടറി ശമീര്‍ ഫൈസി കോട്ടോപ്പാടം സ്വാഗതവും ജോയന്റ് സെക്രട്ടറി കുഞ്ഞുമുഹമ്മദ് ഫൈസി മോളൂര്‍ നന്ദിയും പറഞ്ഞു.