പെരിന്തല്‍മണ്ണ: പ്രണയം നടിച്ച് യുവതിയെ പീഡിപ്പിക്കുകയും സ്വര്‍ണവും പണവും തട്ടിയെടുക്കുകയും ചെയ്ത സംഭവത്തില്‍ യുവാവ് പെരിന്തല്‍മണ്ണ പൊലിസിന്റെ പിടിയിലായി. കാസര്‍കോട് മൂളിയാര്‍ സ്വദേശി സുല്‍ത്താന്‍ മന്‍സിലില്‍ മുഹമ്മദ് അന്‍സാറാ(24)ണ് പെരിന്തല്‍മണ്ണ ഡിവൈ.എസ്.പി എം.പി. മോഹനചന്ദ്രന്റെയും സംഘത്തിന്റെയും പിടിയിലായത്. മങ്കട പൊലിസ് സ്റ്റേഷന്‍ പരിധിയില്‍പെട്ട യുവതി നല്‍കിയ പരാതിയിലാണ് അന്‍സാര്‍ അറസ്റ്റിലായത്.
സാമൂഹിക മാധ്യമങ്ങളിലൂടെ പരിചയപ്പെടുന്ന യുവതീ-യുവാക്കള്‍ക്ക് ജോലി വാഗ്ദാനം ചെയ്തും തമിഴ്, തെലുങ്ക് സിനിമകളില്‍ അവസരം നല്‍കാമെന്ന് പറഞ്ഞു വിശ്വസിപ്പിച്ചും പണവും മറ്റും തട്ടുന്ന കേസിലെ പ്രധാനിയാണ് ഇയാളെന്ന് പൊലിസ് പറഞ്ഞു. ഇരകളെ മോഹന വാഗ്ദാനങ്ങള്‍ നല്‍കി വിശ്വസിപ്പിച്ച് ഹൈദരാബാദ്, ബംഗളൂരു ഉള്‍പ്പടെയുള്ള നഗരങ്ങളിലേക്ക് വിളിച്ചുവരുത്തും. തുടര്‍ന്ന് ആഡംബര മുറിയെടുത്ത് തങ്ങി തന്ത്രപൂര്‍വം പണം കൈക്കലാക്കിയ ശേഷം കടന്നുകളയും. സ്ത്രീകളുമായി അടുത്തിടപഴകി അവരുടെ സ്വര്‍ണവും മറ്റും അവരെക്കൊണ്ടുതന്നെ പണയംവയ്പിച്ച് ലക്ഷങ്ങള്‍ കൈക്കലാക്കിയാണ് ഇയാള്‍ തട്ടിപ്പ് നടത്തിയിരുന്നത്.
അല്ലു അര്‍ജ്ജുന്റെ കൂടെ അഭിനയിക്കാന്‍ അവസരം നല്‍കാമെന്ന വാഗ്ദാനം നല്‍കി കോഴിക്കോട് മുക്കത്തുള്ള രണ്ടുയുവാക്കളില്‍നിന്ന് രണ്ടുലക്ഷത്തോളം രൂപ കൈപറ്റിയതായും ഇയാള്‍ പറഞ്ഞു. മക്കളെ ബാലതാരമാക്കാമെന്നു പറഞ്ഞ് കോഴിക്കോടുള്ള രണ്ടാളില്‍ നിന്നായി പതിനായിരം രൂപവീതവും വാങ്ങിയ ഇയാള്‍ മലപ്പുറം, കോഴിക്കോട്, തിരുവനന്തപുരം, കണ്ണൂര്‍, തൃശൂര്‍, കോട്ടയം, വയനാട്, എറണാംകുളം ജില്ലകളിലെ വിവിധ സ്ഥലങ്ങളില്‍ നിന്നായി ഇത്തരത്തില്‍ നിരവധിയാളുകളില്‍നിന്ന് ലക്ഷങ്ങള്‍ വിലമതിക്കുന്ന സ്വര്‍ണവും പണവും തട്ടിയതായും പ്രതി പൊലിസിനോട് സമ്മതിച്ചു. പ്രതിയെ കുറിച്ച് വിവരം ലഭിച്ച പൊലിസ്, ഫേസ്ബുക്ക് ചാറ്റിലൂടെ ജോലി ആവശ്യാര്‍ഥമെന്ന വ്യാജേന ബന്ധം സ്ഥാപിച്ച് മൈസൂരിലേക്ക് വിളിച്ചുവരുത്തിയ ശേഷം കസ്റ്റഡിയില്‍ എടുക്കുകയായിരുന്നു. ഈ സമയം ഒരു സീരിയല്‍താരം പ്രതിയോടൊപ്പമുണ്ടായിരുന്നു. സിനിമയില്‍ അവസരം നല്‍കാമെന്ന വാഗ്ദാനത്തില്‍ അവരില്‍നിന്ന് രണ്ടു ലക്ഷത്തോളം രൂപ കൈപ്പറ്റാനുള്ള ശ്രമത്തിലായിരുന്നു ഇയാള്‍. വിശ്വസിപ്പിക്കാനായി പ്രമുഖ സിനിമാ താരങ്ങളോടൊപ്പം താന്‍ ഉള്‍പ്പെട്ട ഫോട്ടോ പ്രതി താരത്തിന് കൈമാറുകയും ചെയ്തിരുന്നു. ഷൂട്ടിങ് ലൊക്കേഷനുകളില്‍ പോയി സിനിമാ സംവിധായകര്‍ക്കും നായകന്മാര്‍ക്കുമൊപ്പമുള്ള സെല്‍ഫികളും ഇതിനായി ഇയാള്‍ എടുത്തുവച്ചിരുന്നു.