പാനൂര്‍: പാനൂരില്‍ പരിശോധനക്ക് ഡോക്ടര്‍ എത്താത്തതിനെ തുടര്‍ന്ന് നവജാത ശിശു മരിച്ചു. ആരോഗ്യമന്ത്രിയുടെ മണ്ഡലത്തിലാണ് എട്ടു മാസം ഗര്‍ഭിണിയായ യുവതിക്ക് വീട്ടില്‍ പ്രസവിക്കേണ്ടി വന്നത്. തുടര്‍ന്ന് നവജാത ശിശു മരണപ്പെടുകയായിരുന്നു.

പാനൂര്‍ പൊലിസ് സ്റ്റേഷനു സമീപത്തെ മാണിക്കോത്ത് ഹനീഫ-സമീറ ദമ്പതികളുടെ കുഞ്ഞാണ് മരിച്ചത്. ഇന്ന് രാവിലെ അസ്വസ്ഥത അനുഭവപ്പെട്ടതിനെ തുടര്‍ന്ന് ആശുപത്രിയിലേക്ക് മാറ്റുമ്പോഴേക്കും വീട്ടില്‍ തന്നെ പ്രസവം നടന്നിരുന്നു. ഉടന്‍ വീട്ടുകാര്‍ പാനൂര്‍ ഗവ.ആശുപത്രിയിലെത്തി ഡോക്ടറോട് വരാന്‍ ആവശ്യപ്പെട്ടെങ്കിലും കൂട്ടാക്കിയില്ലെന്ന് ബന്ധുക്കള്‍ പറഞ്ഞു.

തുടര്‍ന്ന് വാക്കു തര്‍ക്കവും ബഹളവുമായി. പൊലിസും ഫയര്‍ ഫോഴ്‌സ് അധികൃതരും ബന്ധപ്പെട്ടിട്ടും ഡോക്ടര്‍ വീട്ടിലേക്ക് കൊവിഡ് നിയമങ്ങള്‍ ചൂണ്ടിക്കാട്ടി പോകാന്‍ തയ്യാറായില്ല. ഉടനെ സമീപത്തെ ക്ലിനിക്കില്‍ നിന്നും നഴ്‌സുമാര്‍ എത്തി പൊക്കിള്‍ കൊടി മുറിച്ചു മാറ്റിയെങ്കിലും കുഞ്ഞ് മരിച്ചിരുന്നു.

സമീറയെ തലശ്ശേരി സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്.
ആരോഗ്യമന്ത്രിയുടെ മണ്ഡലത്തില്‍ ഉള്‍പ്പെട്ട പാനൂരില്‍ നവജാത ശിശു മരിച്ച സംഭവത്തില്‍ ജീവനുപോലും വിലകല്‍പ്പിക്കാത്ത ആരോഗ്യ വകുപ്പ് ജീവനക്കാര്‍ക്കെതിരെ നടപടിയെടുക്കണമെന്ന് ജനകീയവേദി കണ്ണൂര്‍ ജില്ലാ കമ്മിറ്റി ആവശ്യപ്പെട്ടു.