ന്യൂഡല്‍ഹി: അസമിലെ അനധികൃത പൗരന്‍മാരുടെ തടവുകേന്ദ്രങ്ങളുമായി ബന്ധപ്പെട്ട കേസില്‍ സുപ്രിംകോടതിയില്‍ നാടകീയ രംഗങ്ങള്‍. കേസ് പരിഗണിക്കുന്നതില്‍നിന്ന് ചീഫ് ജസ്റ്റിസ് രഞ്ജന്‍ ഗൊഗോയ് മാറി നില്‍ക്കണമെന്ന ഹരജിക്കാരന്‍ ഹര്‍ഷ് മന്ദറിന്റെ ആവശ്യം തള്ളിയ ചീഫ് ജസ്റ്റിസ് അധ്യക്ഷനായ ബെഞ്ച് ഹര്‍ഷ് മന്ദറിനെ ഹരജിക്കാരന്റെ സ്ഥാനത്തുനിന്ന് ഒഴിവാക്കി. പകരം സുപ്രിംകോടതി ലീഗല്‍ സര്‍വീസിനെ ഹരജിക്കാരാക്കി. ഹര്‍ഷ് മന്ദറിന്റെ അഭിഭാഷകന്‍ പ്രശാന്ത് ഭൂഷണെ അമിക്കസ് ക്യൂറിയായും നിയമിച്ചു.

തടവിലുള്ളവരെ എത്രയും പെട്ടെന്ന് നാടുകടത്തണമെന്ന് കഴിഞ്ഞതവണ കേസ് പരിഗണിച്ച ചീഫ് ജസ്റ്റിസ് ആവശ്യപ്പെട്ടിരുന്നു. ഇതാണ് ഗൊഗോയ് മാറിനില്‍ക്കണമെന്നാവശ്യപ്പെടാന്‍ കാരണം. ഗൊഗോയ് പിന്‍മാറണമെന്ന ഹര്‍ഷ് മന്ദറിന്റെ ഹരജി സ്വീകരിക്കാന്‍ സുപ്രിംകോടതി രജിസ്ട്രി വിസമ്മതിച്ചിരുന്നെങ്കിലും ജസ്റ്റിസുമാരായ ദീപക് ഗുപ്ത, സഞ്ജീവ് ഖന്ന എന്നിവര്‍ കൂടി അടങ്ങുന്ന ബെഞ്ച് ഹരജി സമര്‍പ്പിക്കാന്‍ അനുവദിച്ചു.

തന്റെ കേസ് സ്വയം വാദിക്കുകയാണെന്നും അഭിഭാഷകനെ ഒഴിവാക്കിയതായും ഹര്‍ഷ് മന്ദര്‍ കോടതിയെ അറിയിച്ചു. പേടികൂടാതെ എല്ലാം പറയാമെന്നും കടലാസിലേത് വായിക്കാതെ ഹൃദയത്തില്‍ നിന്ന് പറയാനും ഗൊഗോയ് മന്ദറിനോട് പറഞ്ഞു. തടവുകേന്ദ്രങ്ങളിലെ ദുരിതാവസ്ഥയും തടവുകാരുടെ ഭാവി പ്രശ്‌നങ്ങളും ചൂണ്ടിക്കാട്ടാനാണ് ഹരജി സമര്‍പ്പിച്ചതെന്ന് മന്ദര്‍ പറഞ്ഞു. തടവുകാരെ വിട്ടയയ്ക്കണമെന്നാണ് തന്റെ ആവശ്യം. എന്നാല്‍ കൂടുതല്‍ പേരെ അറസ്റ്റ് ചെയ്യാനും ആയിരക്കണക്കിന് പേരെ ബലമായി നാടുകടത്താനുമുള്ള കാരണമായി കോടതി ഹരജിയെ മാറ്റിയെന്ന് ഹര്‍ഷ് മന്ദര്‍ പരാതിപ്പെട്ടു.

കേസില്‍ നിന്ന് മാറിനില്‍ക്കാന്‍ തനിക്കെതിരേ അസം സര്‍ക്കാര്‍ നിങ്ങളെ ഹരജിയുമായി അയച്ചതാണെന്നുപറഞ്ഞാന്‍ എങ്ങനെ നിഷേധിക്കുമെന്ന് ഗൊഗോയ് തിരിച്ചു ചോദിച്ചു. കേസില്‍ വാദം നടക്കുമ്പോള്‍ കാര്യങ്ങള്‍ വ്യക്തമായി മനസിലാക്കാന്‍ കോടതി പല കാര്യങ്ങളും പറയും. അതിനെ ജഡ്ജിയുടെ അഭിപ്രായമായി കണക്കാക്കരുത്. ഉത്തരവ് പുറപ്പെടുവിക്കുമ്പോള്‍ അതിലാണ് ജഡ്ജിയുടെ അഭിപ്രായം ഉണ്ടാവുക. ചീഫ് ജസ്റ്റിസ് പറഞ്ഞു.
ഹരജിക്കാരന്റെ പ്രധാന ആവശ്യം ഇപ്പോഴും കോടതിയുടെ പരിഗണനയിലാണെന്നും പിന്നെയെങ്ങനെ വിധി പറഞ്ഞെന്ന് തീരുമാനിക്കാനാവുമെന്നും ഗൊഗോയ് ചോദിച്ചു.

നിങ്ങള്‍ നിങ്ങളുടെ ജഡ്ജിയെ വിശ്വസിക്കണമെന്നും ചീഫ് ജസ്റ്റിസ് പറഞ്ഞു. ഈ ഘട്ടത്തില്‍ ചീഫ് ജസ്റ്റിസിനെ പിന്തുണച്ചു സംസാരിച്ച ജസ്റ്റിസ് സജ്ഞീവ് ഖന്ന ഉത്തരങ്ങള്‍ തേടിയാണ് തങ്ങള്‍ ചോദ്യങ്ങള്‍ ചോദിക്കുന്നതെന്നും ഉത്തരവിറക്കുന്നതുവരെ അഭിപ്രായങ്ങള്‍ മാറാമെന്നും ചൂണ്ടിക്കാട്ടി. എന്നാല്‍, ഇപ്പോഴും തന്റെ ഹരജി സംബന്ധിച്ച് തനിക്ക് ആശങ്കയുണ്ടെന്നായിരുന്നു ഹര്‍ഷ് മന്ദറിന്റെ മറുപടി. കോടതി ചോദ്യങ്ങള്‍ ചോദിക്കാന്‍ പാടില്ലെന്ന് പറയുന്നത് എത്രത്തോളം ദോഷമുണ്ടാക്കുമെന്ന് നിങ്ങള്‍ക്ക് മനസിലാകുന്നുണ്ടോ എന്ന് ചീഫ് ജസ്റ്റിസ് തിരിച്ചുചോദിച്ചു. താന്‍ വിവേചനപൂര്‍വമാണ് പെരുമാറുന്നതെന്ന് മനസിലുറപ്പിച്ചോയെന്നും ഗൊഗോയ് ചോദിച്ചു.

മാധ്യമങ്ങള്‍ അത്തരത്തില്‍ റിപ്പോര്‍ട്ട് ചെയ്തിട്ടുണ്ടെന്നായിരുന്നു മന്ദറിന്റെ മറുപടി. അതിനനുസരിച്ചാണോ താന്‍ കേസില്‍ നിന്ന് പിന്‍മാറണമെന്ന ആവശ്യപ്പെടുന്നതെന്ന് ചീഫ് ജസ്റ്റിസ് ചോദിച്ചു. ഈ ഘട്ടത്തില്‍ അസം സര്‍ക്കാറിനുവേണ്ടി ഹാജരാകുന്ന സോളിസിറ്റര്‍ ജനറല്‍ തുഷാര്‍ മേത്ത, പിന്‍മാറണമെന്ന ആവശ്യത്തെ പിന്തുണയ്ക്കുന്നില്ലെന്ന് വ്യക്തമാക്കി. സ്വയം പിന്‍മാറുന്നത് ഈ സംവിധാനത്തെ തകര്‍ക്കുമെന്നും അതിന് ആരെയും അനുവദിക്കില്ലെന്നും ആവര്‍ത്തിച്ച ചീഫ് ജസ്റ്റിസ് പിന്‍മാറണമെന്ന ഹരജി തള്ളി. ഹര്‍ഷ് മന്ദറിനെ ഹരജിക്കാരന്റെ പദവിയില്‍ നിന്ന് നീക്കാനും പ്രശാന്ത് ഭൂഷണെ അമിക്കസ് ക്യൂറിയാക്കാനും ഉത്തരവിട്ടു.