ബെര്‍ലിന്‍: നാല് തവണ ഫോര്‍മുല വണ്‍ കാറോട്ടത്തിലെ ലോക ചാംപ്യന്‍പട്ടം സ്വന്തമാക്കിയ സെബാസ്റ്റ്യന്‍ വെറ്റല്‍ ഇനി ഇറങ്ങുക പുതിയ ടീമിനൊപ്പം. കനേഡിയന്‍ റേസിങ് പോയിന്റ് ടീമായ ആസ്റ്റന്‍ മാര്‍ട്ടിന്റെ തട്ടകത്തേക്കാണ് വെറ്റല്‍ ഫെറാറിയില്‍ നിന്നും കൂടുമാറുന്നത്. ഫെറാറിക്കൊപ്പമുള്ള കരാര്‍ ഈ സീസണോടു കൂടി അവസാനിക്കുന്നതോടെയാണ് ആസ്റ്റന്‍ മാര്‍ട്ടിനുമായി പുതിയ കരാറിലേര്‍പ്പെട്ടത്. ഒന്നിലധികം വര്‍ഷത്തെ കരാറിലാണ് താരം ടീമുമായി ഒപ്പിട്ടത്. മെക്‌സിക്കന്‍ താരമായ സെര്‍ജിയോ പെരെസിന് പകരക്കാരനായാണ് താരത്തെ ആസ്റ്റന്‍ മാര്‍ട്ടിന്‍ ടീമിലെത്തിച്ചത്. ഇറ്റലിയിലെ മുഗല്ലെ സെര്‍ക്യൂട്ടില്‍ നടക്കുന്ന ടുസ്‌കാന്‍ ടസ്‌കാന്‍ ഗ്രാന്‍ഡ് പ്രിക്‌സിന് മുന്നോടിയായുള്ള ടീം പ്രസ്താവനയ്ക്കിടെയാണ് വെറ്റലിന്റെ വെളിപ്പെടുത്തല്‍.