മണ്ണഞ്ചേരി: വീടിനോട് ചേര്‍ന്നുള്ള ഷെഡ് കത്തി നശിച്ചു. ഷെഡില്‍ സൂക്ഷിച്ചിരുന്ന വീട്ടുപകരണങ്ങളും മറ്റും കത്തി ചാമ്പലായി. മണ്ണഞ്ചേരി പഞ്ചായത്ത് അഞ്ചാം വാര്‍ഡ് കളത്തില്‍ മണിയപ്പന്റെ ടിന്‍ ഷീറ്റ് മേഞ്ഞ ഷെഡാണ് ചൊവ്വാഴ്ച്ച വൈകുന്നേരം ആറോടെ കത്തി നശിച്ചത്.
തോട്ടില്‍ നിന്നും മറ്റും വീട്ടുകാരും സമീപ വാസികളും ചേര്‍ന്ന് വെള്ളം ഒഴിച്ചാണ് തീ അണച്ചത്. തയ്യല്‍ മെഷീന്‍, കാക്കാ പുഴുങ്ങാന്‍ ഉപയോഗിക്കുന്ന ബ്ലോവര്‍, സൈക്കിള്‍, തടി ഉരുപ്പടികള്‍, പാത്രങ്ങള്‍, സമീപത്തെ തെങ്ങ് ഉള്‍പ്പടെയുള്ള വൃക്ഷങ്ങളും അഗ്‌നിക്കിരയായി.സമീപത്തുള്ള വീടിന്റെ ജനല്‍ച്ചില്ലുകള്‍ക്കും തീ പടര്‍ന്നു. ഭിത്തിക്കും കേട്പാട് സംഭവിച്ചിട്ടുണ്ട്. മുഹമ്മയില്‍ നിന്ന് വൈദ്യുതവകുപ്പ് ജീവനക്കാര്‍ എത്തി സുരക്ഷിതത്വം ഉറപ്പ് വരുത്തി. വീട്ടില്‍ കൂടി കടന്നു പോകുന്ന കേബിള്‍ വയര്‍ ഷെഡിന്റെ ഷീറ്റില്‍ ഉരസിയാണ് തീ ഉണ്ടായതെന്നാണ് മണിയപ്പന്‍ പറയുന്നത്.