പെരുമ്പാവൂര്‍: നിയോജക മണ്ഡലത്തിലെ 66 വിദ്യാഭ്യാസ സ്ഥാപനങ്ങള്‍ക്ക് 183 ലാപ്പ്‌ടോപ്പുകള്‍ നല്‍കുന്ന പദ്ധതിക്ക് ഭരണാനുമതി ലഭ്യമായതായി അഡ്വ. എല്‍ദോസ് കുന്നപ്പിള്ളി എം.എല്‍.എ അറിയിച്ചു. യു.പി തലം വരെയുള്ള 65 സ്‌കൂളുകള്‍ക്ക് 133 ലാപ്പ്‌ടോപ്പുകള്‍ നല്‍കും. സര്‍ക്കാര്‍, ഏയ്ഡഡ് വിദ്യാലയങ്ങള്‍ക്ക് ഇതിന്റെ പ്രയോജനം ലഭ്യമാകും. കൂടാതെ പെരുമ്പാവൂര്‍ ഗവ. പോളിടെക്‌നിക് കോളജിന്റെ കംപ്യൂട്ടര്‍ ലാബിലേക്ക് 50 ലാപ്പ്‌ടോപ്പുകളും ഈ വര്‍ഷം തന്നെ നല്‍കുമെന്ന് എം.എല്‍.എ പറഞ്ഞു. ഈ വര്‍ഷത്തെ പ്രാദേശിക വികസന ഫണ്ടില്‍ നിന്നും 57 ലക്ഷം രൂപയാണ് പദ്ധതിക്കായി അനുവദിച്ചത്. കഴിഞ്ഞ വര്‍ഷം നമ്മുടെ സ്‌കൂള്‍ സ്മാര്‍ട്ട് ആകുന്നു പദ്ധതിയില്‍ ഉള്‍പ്പെടുത്തി 41 സ്‌കൂളുകള്‍ക്ക് ക്ലാസ് മുറികള്‍ ഹൈടെക് ആക്കുന്നതിന് പ്രാദേശിക വികസന ഫണ്ടില്‍ നിന്നും 25.83 ലക്ഷം രൂപ അനുവദിച്ചിരുന്നു. ഇതിന്റെ രണ്ടാം ഘട്ടമായാണ് ഈ വര്‍ഷം ലാപ്പ്‌ടോപ്പുകള്‍ നല്‍കുന്നത്. ടെന്‍ഡര്‍ ഉള്‍പ്പെടെയുള്ള നടപടികള്‍ പൂര്‍ത്തികരിച്ചതായി എം.എല്‍.എ അറിയിച്ചു
അവസാനഘട്ട പരിശോധനകള്‍ക്ക് ശേഷം ലാപ്പ്‌ടോപ്പുകള്‍ വിതരണം ചെയ്യുമെന്ന് എം.എല്‍.എ അറിയിച്ചു.