മൊഹാലി:പഞ്ചാബിനെതിരെ കൊല്‍ക്കത്തയ്ക്ക് തകര്‍പ്പന്‍ ജയം. 184 റണ്‍സ് വിജയലക്ഷ്യവുമായിറങ്ങിയ കെ.കെ.ആര്‍ 18 ഓവറില്‍ മൂന്ന് വിക്കറ്റ് നഷ്ടത്തില്‍ ലക്ഷ്യം മറികടന്നു. ഓപണര്‍ ക്രിസ്‌ലിന്‍ തകര്‍പ്പന്‍ തുടക്കമാണ് കൊല്‍ക്കത്തയ്ക്ക് നല്‍കിയത്. ആറാം ഓവറില്‍ 46(22) റണ്‍സുമായി ലിന്‍ മടങ്ങുമ്പോള്‍ കൊല്‍ക്കത്തയുടെ സ്‌കോര്‍ 60 കടന്നിരുന്നു. തുടര്‍ന്ന് ശുഭ്മാന്‍ ഗില്ലും റോബിന്‍ ഉത്തപ്പയും നിലയുറപ്പിച്ച് കളിച്ചതോടെ കൊല്‍ക്കത്ത വിജയത്തോടടുത്തു. 22 റണ്‍സെടുത്ത ഉത്തപ്പയും 24 റണ്‍സെടുത്ത റസ്സലും പുറത്തായെങ്കിലും ക്യാപ്റ്റന്‍ ദിനേശ് കാര്‍ത്തിക്കിനെ കൂട്ടുപിടിച്ച് ഗില്‍ ടീമിനെ വിജയത്തിലെത്തിക്കുകയായിരുന്നു. 65(49) റണ്‍സുമായി ഗില്ലും 21(9) റണ്‍സുമായി കാര്‍ത്തിക്കും പുറത്താകാതെ നിന്നു.
അഞ്ചു ബൗണ്ടറിയും രണ്ടു സിക്‌സറും ഉള്‍പ്പെടുന്നതാണ് ഗില്ലിന്റെ ഇന്നിങ്‌സ്. നേരത്തെ സാം കറന്റെയും പൂരന്റെയും ബാറ്റിങ് മികവിലാണ് പഞ്ചാബ് മികച്ച സ്‌കോര്‍ കണ്ടെത്തിയത്.
നേരത്തേ കൊല്‍ക്കത്തയില്‍ നടന്ന ഈ സീസണിലെ ആദ്യപാദത്തില്‍ ജയം കെ.കെ.ആറിനായിരുന്നു. കൂറ്റന്‍ അടിക്ക് തുനിഞ്ഞിറങ്ങിയ പഞ്ചാബിന് തുടക്കത്തിലേ തിരിച്ചടി നേരിട്ടു. രണ്ട് റണ്‍സുമായി രാഹുല്‍ പുറത്തായി. അധികം വൈകാതെ പഞ്ചാബിന് ഗെയിലിനേയും നഷ്ടമായി . 14 പന്തില്‍ നിന്ന് 14 റണ്‍സായിരുന്നു ഗെയിലിന്റെ സമ്പാദ്യം. നിക്കോളാസ് പൂരന്‍ (48), മായങ്ക് അഗര്‍വാള്‍ (36), മന്‍ദീപ് സിങ് (25) എന്നിവരാണ് മറ്റു പ്രധാന സ്‌കോറര്‍മാര്‍. വിക്കറ്റ് കീപ്പറായ പൂരന്‍ 27 പന്തില്‍ നാലു ബൗണ്ടണ്ടറികളുടെയും മൂന്നു സിക്‌സറിന്റെയും സഹായത്തോടെയാണ് 48 റണ്‍സ് നേടിയത്. പിന്നീടെത്തിയ അശ്വിന്‍ റസ്സലിന്റെ പന്തില്‍ ബൗള്‍ഡായി പൂജ്യനായി മടങ്ങി. കൊല്‍ക്കത്തക്ക് വേണ്ടി സന്ദീപ് വാര്യര്‍ രണ്ട് വിക്കറ്റും ഗേണി, റാണ, റസല്‍ എന്നിവര്‍ ഓരോ വിക്കറ്റ് വീതവും വീഴ്ത്തി.

ജയത്തോട് കൂടി കൊല്‍ക്കത്ത പ്ലേഓഫ് സാധ്യതകള്‍ സജീവമാക്കി. ഈ കളിയില്‍ തോറ്റതോട് കൂടി പഞ്ചാബ് പ്ലേഓഫ് കാണാതെ പുറത്തായി.