കല്‍പ്പറ്റ: ഭൂരഹിതരായ ആദിവാസികളോട് കടക്ക് പുറത്ത് എന്നാണ് സര്‍ക്കാരിന്റെ ഭാവമെങ്കില്‍ ആദ്യം ഇറക്കി വിടേണ്ടത് സി.പി.എം നേതൃത്വം നല്‍കുന്ന എ.കെ.എസ് പ്രവര്‍ത്തകരെയാണെന്ന് ആദിവാസി ഗോത്രമഹാസഭ നേതാവ് ഗീതാനന്ദന്‍.
വിതരണത്തിന് സര്‍ക്കാര്‍ കണ്ടുവച്ച കണ്ണായ ഭൂമിയില്‍ അവകാശം സ്ഥാപിച്ചിട്ടുള്ളത് എ.കെ.എസ് ആണെന്നും തൊവരിമല സമരത്തിന് പിന്തുണ അറിയിച്ച് നടത്തിയ മാര്‍ച്ച് ഉദ്ഘാടനം ചെയ്ത് സംസാരിക്കവെ അദ്ദേഹം പറഞ്ഞു. ഹാരിസണ് വേണ്ടിയാണ് ആദിവാസികളെ സമരഭൂമിയില്‍ നിന്നും അറസ്റ്റ് ചെയ്ത് നീക്കിയതെന്നും ഗീതാനന്ദന്‍ ആരോപിച്ചു. ഭൂമി കൈയേറ്റം കുറ്റകരം ആണെങ്കില്‍ തൊവരിമലയിലെ പാവപ്പെട്ട ആദിവാസികളെ ഇറക്കി വിടും മുന്‍പ് എ.കെ.എസിന്റെ നേതൃത്വത്തില്‍ വര്‍ഷങ്ങളായി സമരത്തിന് നേതൃത്വം കൊടുക്കുന്നവരെ അറസ്റ്റ് ചെയ്യാന്‍ സര്‍ക്കാര്‍ തയാറാകുമോയെന്നും ഗീതാനന്ദന്‍ ചോദിച്ചു. വയനാട് കലക്ടറേറ്റ് പടിക്കല്‍ 11 ദിവസമായി നടന്നുവരുന്ന തൊവരിമല സമരത്തിന് പിന്തുണ അറിയിച്ച് നിരവധി സംഘടനകളാണ് രംഗത്തെത്തിയത്. ആദിവാസി ദലിത് ജനാധിപത്യ ഐക്യദാര്‍ഢ്യ മാര്‍ച്ച് എന്നപേരില്‍ സമര പന്തലിലേക്ക് മാര്‍ച്ച് നടത്തിക്കൊണ്ടായിരുന്നു ഗീതാനന്ദനും സംഘവും സമരത്തിന് പിന്തുണ അറിയിച്ചത്. അതേസമയം, റിമാന്‍ഡില്‍ കഴിയുന്ന സമരസമിതി നേതാക്കളുടെ ജാമ്യാപേക്ഷ ജില്ലാ കോടതി നാളത്തേക്ക് മാറ്റി. ഇവരെ വിട്ടുകിട്ടണമെന്നും മുഴുവന്‍ ഭൂരഹിതര്‍ക്കും ഭൂമി അനുവദിക്കണമെന്നും ആവശ്യപ്പെട്ടാണ് കഴിഞ്ഞ 11 ദിവസമായി രാവും പകലും ആദിവാസികള്‍ കലക്ടറേറ്റ് പടിക്കല്‍ ധര്‍ണയിരിക്കുന്നത്.