പോങ്‌യാങ്: യു.എസുമായുള്ള ചര്‍ച്ചകള്‍ അലസിയ ശേഷം ആദ്യമായി ഉത്തര കൊറിയ മിസൈല്‍ പരീക്ഷണം നടത്തി. രാജ്യത്തിന്റെ കിഴക്കുഭാഗത്തുള്ള ഹോഡോയില്‍ നിന്നാണ് നിരവധി ഹ്രസ്വദൂര മിസൈലുകള്‍ വിക്ഷേപിച്ചതെന്ന് ദക്ഷിണ കൊറിയ അറിയിച്ചു. 2017ല്‍ ഭൂഖണ്ഡാന്തര ബാലിസ്റ്റിക് മിസൈല്‍ പരീക്ഷിച്ചശേഷം ആദ്യമായാണ് ഉത്തര കൊറിയ മിസൈല്‍ പരീക്ഷണം നടത്തുന്നത്. കഴിഞ്ഞമാസം തന്ത്രപ്രധാന ആയുധം പരീക്ഷിച്ചതായി ഉത്തര കൊറിയ അറിയിച്ചിരുന്നു.
അതേസമയം, ഉത്തര കൊറിയയുടെ പ്രവൃത്തികള്‍ തങ്ങള്‍ നിരീക്ഷിച്ചുകൊണ്ടിരിക്കുന്നുണ്ടെന്ന് യു.എസ് പ്രസ് സെക്രട്ടറി സാറ സാന്‍ഡേഴ്‌സ് പ്രതികരിച്ചു.