തിരുവനന്തപുരം: സ്വപ്‌നയ്‌ക്കൊപ്പം സെല്‍ഫി എടുത്ത വനിതാ പൊലിസുകാര്‍ക്കെതിരെ അച്ചടക്ക നടപടി. ഇവരെ പണിഷ്‌മെന്റ് റോള്‍ പട്ടികയില്‍പെടുത്തി.

തൃശൂര്‍ മെഡിക്കല്‍ കോളജില്‍ ചികിത്സയില്‍ കഴിയുന്ന സമയത്താണ് ആറു വനിതാ പൊലിസുകാര്‍ സെല്‍ഫിയെടുത്തത്. ഇവര്‍ സ്വപ്‌നയ്‌ക്കൊപ്പം സെല്‍ഫി എടുത്തത് ഏത് സാഹചര്യത്തിലാണെന്ന് ജില്ലാ ക്രൈംബ്രാഞ്ച് പരിശോധിക്കും. പൊലിസുകാര്‍ക്ക് സ്വപ്‌നയുമായി അടുത്ത സൗഹൃദമുണ്ടായോ എന്നും പരിശോധിക്കും. അന്വേഷണ റിപ്പോര്‍ട്ടിന്റെ അടിസ്ഥാനത്തില്‍ അച്ചടക്ക നടപടി എടുക്കാനാണ് തീരുമാനം.

ആദ്യ തവണ നെഞ്ചുവേദനയ്ക്ക് ചികിത്സയില്‍ കഴിയവെയാണ് തൃശൂര്‍ സിറ്റി പൊലിസിലെ വനിതാപൊലിസുകാര്‍ സ്വപ്നയ്ക്കൊപ്പം സെല്‍ഫിയെടുത്തത്. വിഷയം ശ്രദ്ധയില്‍പെട്ടതോടെ പൊലിസ് കമ്മിഷണര്‍ അന്വേഷണം പ്രഖ്യാപിച്ചു.