മലപ്പുറം:വര്‍ഷത്തെ എസ്എസ്എല്‍സി പരീക്ഷാ ഫലം പ്രഖ്യാപിച്ചപ്പോള്‍ഏറ്റവും കൂടുതല്‍ മുഴുവന്‍ എപ്ലസ് ലഭിച്ച കുട്ടികള്‍ മലപ്പുറം ജില്ലയില്‍. സംസ്ഥാനത്താകെ 426513 വിദ്യാര്‍ഥികളാണ് ഇത്തവണ എസ്എസ്എല്‍സി പരീക്ഷ എഴുതിയത്. 37334 വിദ്യാര്‍ഥികള്‍ക്ക് എല്ലാ വിഷയത്തിലും എ പ്ലസ് ലഭിച്ചു. മലപ്പുറത്ത് പരീക്ഷ എഴുതിയ 2493 കുട്ടികള്‍ എല്ലാ വിഷയത്തിലും എ പ്ലസ് സ്വന്തമാക്കി

വര്‍ഷങ്ങളായി മലപ്പുറത്താണ് ഏറ്റവും കൂടുതല്‍ ഫുള്‍ എ പ്ലസ് കുട്ടികള്‍. മലപ്പുറത്തെ കുട്ടികള്‍ ഫുള്‍ എപ്ലസിന്റെ കാര്യത്തില്‍ മുന്നിലെത്തുമ്പോള്‍ സാമൂഹിക മാധ്യമങ്ങളിലടക്കം ചര്‍ച്ചയാവുന്ന കാര്യമാണ് അബ്ദുറബ്ബ് വിദ്യാഭ്യാസ മന്ത്രിയായിരിക്കുന്ന കാലത്ത് മുന്‍ മുഖ്യമന്ത്രി വിഎസ് അച്യുതാനന്ദന്‍ മലപ്പുറത്തെ വിദ്യാര്‍ഥികള്‍ക്കെതിരേ നടത്തിയ വിദ്വേഷ പരാമര്‍ശം. മലപ്പുറത്തെ വിദ്യാര്‍ഥികള്‍ കോപ്പിയടിച്ച് വിജയിക്കുന്നുവെന്നായിരുന്നു ജില്ലയിലെ വിദ്യാര്‍ഥികള്‍ക്കെതിരായ വിഎസിന്റെ പരാമര്‍ശം. എന്നാല്‍ എല്ലാ വര്‍ഷവും മികച്ച വിജയം കാഴ്ചവച്ച് വിഎസിന്റെ വാക്കുകളോട് മധുര പ്രതികാരം ചെയ്യുകയാണ് മലപ്പുറത്തെ കുട്ടികള്‍.

തീവ്രവാദജില്ലയെന്നതടക്കമുള്ള വിവിധ നേതാക്കള്‍ മലപ്പുറത്തിനെതിരേ നടത്തിയ പരാമര്‍ശങ്ങളും വിദ്യാര്‍ഥികള്‍ മികച്ച നേട്ടം കൊയ്യുമ്പോള്‍ സാമൂഹിക മാധ്യമങ്ങളില്‍ വിമര്‍ശിക്കപ്പെടുകയാണ്. ഒരു പ്രദേശത്തെ മുഴുവനായി മാറ്റിനിര്‍ത്തുന്ന വിവേചനത്തിനെതിരായ വിജയമായും സാമൂഹിക മാധ്യമങ്ങളില്‍ എപ്ലസ് നേട്ടം ചര്‍ച്ചയാവുന്നുണ്ട്.