മദീന: സി.ബി.എസ്.സി പത്താം ക്ലാസ് പരീക്ഷയില്‍ യാമ്പു അല്‍ മനാര്‍ ഇന്റര്‍ നാഷനല്‍ സ്‌കൂളിന് ഈ വര്‍ഷവും നൂറുമേനിയുടെ തിളക്കം. സ്‌കൂളിലെ ആര്‍. സായി ശക്തി, ഷാരിഖ് നിയാസ്, റിവ സോജി എന്നീ വിദ്യാര്‍ഥികള്‍ യഥാക്രമം 96.8, 93.8, 92.2. ശതമാനം നേടി ഉയര്‍ന്ന വിജയം കരസ്ഥമാക്കി. പരീക്ഷയെഴുതിയ 38 വിദ്യാര്‍ഥികളില്‍ 24 പേര്‍ക്ക് ഡിസ്റ്റിംക്ഷനും 11 പേര്‍ക്ക് ഫസ്റ്റ് ക്ലാസും 3 പേര്‍ക്ക് സെക്കന്റ് ക്ലാസും ലഭിച്ചു. ഉന്നത വിജയം നേടിയ വിദ്യാര്‍ഥികള്‍ക്കൊപ്പം അധ്യാപകര്‍, രക്ഷിതാക്കള്‍, മറ്റ് സ്‌കൂള്‍ സ്റ്റാഫ് തുടങ്ങി മുഴുവന്‍ പേരും ഈ നേട്ടത്തില്‍ പങ്കാളികളാണെന്ന് സ്‌കൂള്‍ മാനേജ്‌മെന്റ് അറിയിച്ചു.

പരീക്ഷയില്‍ ഉന്നത വിജയം നേടിയവരെ സ്‌കൂള്‍ പ്രിന്‍സിപ്പല്‍ കാപ്പില്‍ ഷാജി മോന്‍, വൈസ് പ്രിന്‍സിപ്പല്‍ പി.എം. ഫാഇസ, ബോയ്‌സ് വിഭാഗം ഹെഡ്മാസ്റ്റര്‍ സയ്യിദ് യൂനുസ്, ഗേള്‍സ് വിഭാഗം ഹെഡ്മിസ്ട്രസ് രഹ്‌ന ഹരീഷ് എന്നിവര്‍ അഭിനന്ദിച്ചു.