ഗൂഡല്ലൂര്‍: ഗൂഡല്ലൂര്‍ ട്രാന്‍സ്‌പോര്‍ട്ട് ഡിപ്പോയില്‍ നിന്ന് ഓവാലി പഞ്ചായത്തിലെ ഗാന്ധിനഗറിലേക്കുള്ള ബസ് സര്‍വിസ് പുനരാരംഭിക്കണമെന്ന ആവശ്യം ശക്തമാകുന്നു. നിരവധി പേര്‍ ആശ്രയിക്കുന്ന ഗൂഡല്ലൂര്‍ ഡിപ്പോയില്‍ നിന്ന് ഗാന്ധി നഗറിലേക്കുള്ള രാത്രി 7.15 നുള്ള സര്‍വിസാണ് അധികൃതര്‍ അകാരണമായി നിര്‍ത്തിയത്.
മൂന്നുമാസത്തോളമായി സര്‍വിസ് നിര്‍ത്തിവച്ചിരിക്കുകയാണ്. കൂടാതെ ഡിപ്പോയില്‍ നിന്ന് പ്രദേശത്തേക്കുള്ള മറ്റു സര്‍വിസുകള്‍ കൃത്യസമയം പാലിക്കുന്നില്ലെന്ന പരാതിയും വ്യാപകമാണ്. കാട്ടാന തുടങ്ങിയ വന്യമൃഗങ്ങളുടെ ശല്യം രൂക്ഷമായ ഈ പ്രദേശത്ത് ഗൂഡല്ലൂര്‍ ഭാഗത്തു നിന്നും വിവിധ ആവശ്യങ്ങള്‍ കഴിഞ്ഞ് വീടുകളിലേക്ക് തിരിച്ചു പോകാന്‍ ബസില്ലാത്തതിനാല്‍ സാധാരക്കാര്‍ പോലും അമിത ചാര്‍ജ് നല്‍കി ടാക്‌സി വാഹനങ്ങളെ ആശ്രയിക്കേണ്ട സ്ഥിതിയാണുള്ളത്. ബസ് സര്‍വിസ് വീണ്ടും തുടങ്ങണമെന്ന് ആവശ്യപ്പെട്ട് ബന്ധപ്പെട്ടവര്‍ക്ക് പരാതി നല്‍കി കാത്തിരിക്കുകയാണ് നാട്ടുകാര്‍.