ഊട്ടി: നീലഗിരി ജില്ലയില്‍ മൂന്ന് നിയമസഭാ മണ്ഡലങ്ങളിലുമായി ആകെ 5,63,883 വോട്ടര്‍മാര്‍. ജില്ലാ ഭരണകൂടം പുറത്തിറക്കിയ കരട് വോട്ടര്‍ പട്ടികയില്‍ സ്ത്രീ വോട്ടര്‍മാരാണ് കൂടുതല്‍. മൂന്നു മണ്ഡലങ്ങളിലുമായി 17,625 സ്ത്രീവോട്ടര്‍മാരാണ് കൂടുതലുള്ളത്. ഗൂഡല്ലൂര്‍, ഊട്ടി, കുന്നൂര്‍ മണ്ഡലങ്ങളിലായി എട്ടു ട്രാന്‍സ്ജന്റേഴ്‌സും വോട്ടര്‍ പട്ടികയിലുണ്ട്.
വോട്ടര്‍പ്പട്ടിക ജില്ലാ കലക്ടര്‍ ഇന്നസെന്റ് ദിവ്യ പ്രകാശനം ചെയ്തു. 1,345 വോട്ടര്‍മാരാണ് ഇക്കുറി പുതുതായി പട്ടികയില്‍ പേര് ചേര്‍ത്തത്.
18, 19നും ഇടയില്‍ പ്രായമുള്ള 2,152 വോട്ടര്‍മാരാണുള്ളത്. ഇതില്‍ 1,198 പുരുഷന്മാരും 954 സ്ത്രീകളുമാണ്. ഊട്ടി നിയമസഭാ മണ്ഡലത്തില്‍ 1,98,332 വോട്ടര്‍മാരും കുന്നൂര്‍ മണ്ഡലത്തില്‍ 1,85,268 വോട്ടര്‍മാരുണ്ട്. ഗൂഡല്ലൂര്‍ സംവരണ മണ്ഡലത്തില്‍ അകെ വോട്ടര്‍മാരുടെ എണ്ണം 1,79,283.
ഊട്ടി നിയമസഭാ മണ്ഡലത്തില്‍ 239 പോളിങ് ബൂത്തുകളും കുന്നൂര്‍, ഗൂഡല്ലൂര്‍ മണ്ഡലങ്ങളില്‍ യഥാക്രമം 223, 221 പോളിങ് ബൂത്തുകളാണ് ജില്ലയിലുള്ളത്.