ഉരുള്‍പൊട്ടലും മണ്ണിടിച്ചിലും ലാന്റ് സബ്‌സിഡന്‍സ് പ്രതിഭാസവും 1,221 കുടുംബങ്ങളെ നേരിട്ട് ബാധിച്ചു
കല്‍പ്പറ്റ: അതിതീവ്ര മഴയില്‍ ഏറ്റവും കൂടുതല്‍ ഉരുള്‍പൊട്ടലുണ്ടായത് വൈത്തിരി ഗ്രാമപ്പഞ്ചായത്തില്‍. 16 ഉരുള്‍പൊട്ടലുകളിലായി 31.37 ഏക്കര്‍ ഭൂമിയാണ് ഒലിച്ചുപോയത്. 35 കുടുംബങ്ങളെ ഇതു നേരിട്ട് ബാധിച്ചതായുമായാണ് കണക്കുകള്‍. ജില്ലാ മണ്ണുസംരക്ഷണ വിഭാഗം സമര്‍പ്പിച്ച റിപ്പോര്‍ട്ടിലാണ് ഇക്കാര്യങ്ങളുള്ളത്. പേമാരിയെ തുടര്‍ന്നുണ്ടായ ചെറുതും വലുതുമായ ഉരുള്‍പൊട്ടലും മണ്ണിടിയലിലും ഭൂമി വിണ്ടുകീറി ഇടിഞ്ഞുതാഴുന്ന പ്രതിഭാസവും (ലാന്റ് സബ്‌സിഡന്‍സ്) 1,221 കുടുംബങ്ങളെ നേരിട്ട് ബാധിച്ചതായും റിപ്പോര്‍ട്ടിലുണ്ട്.
22 തദ്ദേശസ്ഥാപനങ്ങളുടെ പരിധിയില്‍ താമസിക്കുന്ന കുടുംബങ്ങളാണിത്. 47 ഉരുള്‍പൊട്ടലുകള്‍ ജില്ലയുടെ വിവിധ ഭാഗങ്ങളിലായി റിപ്പോര്‍ട്ട് ചെയ്തു. ഏറ്റവും കൂടുതല്‍ ഭൂമി ഒലിച്ചുപോയത് പൊഴുതന ഗ്രാമപ്പഞ്ചായത്തിലാണ്. 11 സ്ഥലങ്ങളിലുണ്ടായ ഉരുള്‍പൊട്ടലില്‍ 243.5 ഏക്കര്‍ ഭൂമി ഉപയോഗശൂന്യമായി.
82 കുടുംബങ്ങളാണ് ഇവിടെ പ്രതിസന്ധിയിലായത്. തവിഞ്ഞാല്‍ ഗ്രാമപ്പഞ്ചായത്തില്‍ മക്കിമല പ്രദേശത്താണ് ഉരുള്‍പൊട്ടലിന്റെ തോത് രൂക്ഷമായി അനുഭവപ്പെട്ടത്. ഇവിടെ രണ്ടിടങ്ങളില്‍ ഉരുള്‍പൊട്ടി 100 കുടുംബങ്ങള്‍ ദുരിതാശ്വാസ ക്യാംപുകളിലേക്ക് മാറി. നാലേക്കര്‍ ഭൂമി കൃഷിവാസയോഗ്യമല്ലാതായി.