തെഹ്‌റാന്‍: യു.എസ് വിമാനവാഹിനി 21 ദിവസം മുന്‍പ് മെഡിറ്ററേനിയന്‍ കടലില്‍ പ്രവേശിക്കുന്നതു മുതല്‍ ഇറാന്‍ സേനയുടെ നിരീക്ഷണത്തിലായിരുന്നെന്ന് ഇറാന്‍ സുപ്രിം കൗണ്‍സില്‍ വക്താവ് കെയ്‌വാന്‍ ഖസ്‌റാവി.
മധ്യേഷ്യയിലേക്ക് അമേരിക്ക വിമാനവാഹിനി കപ്പലുകളും യുദ്ധവിമാനങ്ങളും അയച്ച നടപടി മന:ശാസ്ത്രയുദ്ധമാണെന്നും ഇറാന്‍ വ്യക്തമാക്കി.
തങ്ങളുടെ താല്‍പര്യങ്ങള്‍ക്കും സഖ്യരാജ്യങ്ങള്‍ക്കും ഇറാന്‍ ഭീഷണിയാവുന്നതിനെതിരേ മുന്നറിയിപ്പായി യു.എസ്.എസ് എബ്രഹാം ലിങ്കണ്‍ വിമാനവാഹിനി കപ്പലും യുദ്ധവിമാനങ്ങളും അയക്കുന്നതായി ഞായറാഴ്ച യു.എസ് ദേശീയ സുരക്ഷാ ഉപദേഷ്ടാവ് ജോണ്‍ ബോള്‍ട്ടന്‍ പറഞ്ഞിരുന്നു.
അതേസമയം ഇറാന്റെ ഭാഗത്തു നിന്ന് പ്രകോപനമുണ്ടാവാതിരിക്കാനാണ് സേനാവിന്യാസം നടത്തിയതെന്ന് യു.എസ് പ്രതിരോധ സെക്രട്ടറിയുടെ ചുമതലയുള്ള പാട്രിക് ഷാനഹാന്‍ പറഞ്ഞു.
2003ല്‍ ഇറാഖ് അധിനിവേശത്തോടനുബന്ധിച്ച് അമേരിക്ക യു.എസ്.എസ് എബ്രഹാം ലിങ്കണ്‍ ഗള്‍ഫില്‍ വിന്യസിച്ചിരുന്നു.