ലിലോങ്‌വ്(മലാവി): ആഫ്രിക്കന്‍ രാജ്യമായ മലാവിയില്‍ ആനക്കൊമ്പ് വേട്ടക്കാരെ നിരീക്ഷിക്കാന്‍ പട്രോള്‍ നടത്തുകയായിരുന്ന ബ്രിട്ടിഷ് പട്ടാളക്കാരന്‍ ആനയുടെ ചവിട്ടേറ്റ് കൊല്ലപ്പെട്ടു. 22കാരനായ മാത്യു ടാല്‍ബോട്ടാണ് കൊല്ലപ്പെട്ടതെന്ന് പ്രതിരോധ മന്ത്രാലയം അറിയിച്ചു. ദക്ഷിണ മലാവിയിലെ ലിവോന്‍ഡെ ദേശീയോദ്യാനത്തില്‍ വച്ചായിരുന്നു സംഭവം.
വന്യജീവികളെ വേട്ടയാടുന്നതിനെതിരേ ലോകത്തിന്റെ വിവിധ ഭാഗങ്ങളില്‍ പ്രവര്‍ത്തിക്കുന്ന ബ്രിട്ടിഷ് പട്ടാളക്കാര്‍ നേരിടുന്ന അപകടങ്ങളെയാണിത് കാണിക്കുന്നതെന്ന് പ്രതിരോധ സെക്രട്ടറി പെന്നി മോര്‍ഡാന്റ് പറഞ്ഞു. വേട്ടക്കാരെ നേരിടാനായി മലാവിയിലെ രണ്ടു ദേശീയ പാര്‍ക്കുകളിലുള്ള സൈനികരുടെ എണ്ണം 120 ആയി വര്‍ധിപ്പിക്കുമെന്ന് 2018ല്‍ അന്നത്തെ പ്രതിരോധ സെക്രട്ടറി പ്രഖ്യാപിച്ചിരുന്നു.