ന്യൂഡല്‍ഹി: ജനങ്ങളുടെ പ്രതിഷേധിക്കാനുള്ള സ്വാതന്ത്ര്യവും സഞ്ചരിക്കാനുള്ള സ്വാതന്ത്ര്യവും ഒത്തുപോകണമെന്ന് സുപ്രിംകോടതി. പൗരത്വ നിയമ ഭേദഗതിക്കെതിരേ നടന്ന ഷഹീന്‍ബാഗ് സമരത്തിനെതിരായി മാര്‍ച്ചില്‍ സമര്‍പ്പിച്ച ഹരജി പരിഗണിക്കവെയാണ് ജസ്റ്റിസുമാരായ എസ്.കെ കൗള്‍, അനിരുദ്ധബോസ്, കൃഷ്ണ മുരാരി എന്നിവരടങ്ങിയ ബെഞ്ചിന്റെ പരാമര്‍ശം. പ്രതിഷേധിക്കാനുള്ള സ്വാതന്ത്ര്യം നിയന്ത്രണമില്ലാത്തതല്ലെന്നും കോടതി ചൂണ്ടിക്കാട്ടി. കേസ് വിധി പറയാനായി മാറ്റി. കൊവിഡ് പടരുന്ന സാഹചര്യത്തില്‍ ഷഹീന്‍ബാഗ് സമരം ഉടന്‍ അവസാനിപ്പിക്കണമെന്നാവശ്യപ്പെട്ട് അഭിഭാഷകനായ അമിത് ഷാനിയാണ് ഹരജി സമര്‍പ്പിച്ചത്. 

 

ഷഹീന്‍ബാഗ് സമരം ഇപ്പോഴില്ലാത്ത സാഹചര്യത്തില്‍ ഈ ഹരജി നിലനില്‍ക്കുന്നതല്ലെന്ന നിലപാടാണ് കേന്ദ്ര സര്‍ക്കാരിനു വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്ത ഇന്നലെ സ്വീകരിച്ചത്. എന്നാല്‍ കേസ് അവസാനിപ്പിക്കരുതെന്നും ഇത്തരം സമരങ്ങളുമായി ബന്ധപ്പെട്ട് കോടതി പരിഗണിക്കേണ്ട ചില കാര്യങ്ങള്‍ ഇപ്പോഴുമുണ്ടെന്നും ഷഹീന്‍ബാഗ് സമരക്കാര്‍ക്കു വേണ്ടി ഹാജരായ അഭിഭാഷകന്‍ മെഹ്മൂദ് പ്രാച ചൂണ്ടിക്കാട്ടി. സമാധാനപരമായ സമരമാണ് ഷഹീന്‍ബാഗില്‍ നടന്നത്. എന്നാല്‍ ഈ സമരത്തെ തകര്‍ക്കാന്‍ സര്‍ക്കാര്‍ അതിന്റെ സംവിധാനങ്ങള്‍ ദുരുപയോഗം ചെയ്തു. ഷഹീന്‍ബാഗ് സമരക്കാര്‍ കലാപം നടത്താന്‍ പോകുന്നുവെന്ന പ്രചാരണം വരെയുണ്ടായി. പൗരര്‍ക്ക് പ്രതിഷേധിക്കാനുള്ള അവകാശമുണ്ടെന്നും പ്രാച പറഞ്ഞു. 

 

ഈ ഘട്ടത്തില്‍ ഇടപെട്ട കോടതി, പൗരര്‍ക്ക് പ്രതിഷേധിക്കാനുള്ള അവകാശമുള്ളപ്പോള്‍ തന്നെ വഴിയാത്രക്കാരുടെ അവകാശങ്ങളും സംരക്ഷിക്കപ്പെടേണ്ടതാണെന്ന് നിരീക്ഷിച്ചു. അങ്ങനെയെങ്കില്‍ ഇക്കാര്യത്തില്‍ ഒരു മാര്‍ഗരേഖ പുറപ്പെടുവിക്കണമെന്നും അന്താരാഷ്ട്രതലത്തിലുള്ള മാര്‍ഗരേഖകള്‍ പരിഗണിക്കാവുന്നതാണെന്നും പ്രാച അഭിപ്രായപ്പെട്ടു. ഇന്ത്യന്‍ സാഹചര്യം വ്യത്യസ്തമാണെന്നായിരുന്നു അതിനു കോടതിയുടെ മറുപടി. ഇന്ത്യയിലെ പാര്‍ലമെന്ററി ജനാധിപത്യ സംവിധാനം ചര്‍ച്ചകളുടെയും സംവാദങ്ങളുടെയും വിശാലവീഥിയാണെന്നും കോടതി കൂട്ടിച്ചേര്‍ത്തു. സമരക്കാരുമായി സംസാരിക്കാന്‍ കോടതി നിയോഗിച്ച മധ്യസ്ഥരായ അഭിഭാഷകന്‍ സഞ്ജയ് ഹെഗ്‌ഡെ, സാധനാ രാമചന്ദ്രന്‍ എന്നിവരുടെ സേവനങ്ങളെ കോടതി പ്രകീര്‍ത്തിച്ചു.