മലപ്പുറം: കാലിക്കറ്റ് സര്‍വകലാശാലക്ക് കീഴിലെ അഫിലിയേറ്റഡ് കോളജുകളിലേക്കു നടന്ന തെരഞ്ഞെടുപ്പില്‍ എം.എസ്.എഫിന് ചരിത്രനേട്ടം. സംഘടനാടിസ്ഥാത്തില്‍ തെരഞ്ഞെടുപ്പ് നടന്ന കോളജുകളില്‍ ചിലയിടങ്ങളില്‍ എം.എസ്.എഫ് ഒറ്റക്കും മറ്റിടങ്ങളില്‍ എം.എസ്.എഫ് കെ.എസ്.യു സംഖ്യവും വിജയിച്ചു.
എസ്.എഫ്.ഐ സിറ്റിങ് സീറ്റുകളില്‍ പലതും എം.എസ്.എഫും എം.എസ്.എഫിന്റെ സിറ്റിങ് സീറ്റുകളില്‍ ചിലത് എസ്.എഫ്.ഐയും പിടിച്ചടക്കിയ തെരഞ്ഞെടുപ്പില്‍ ജില്ലയിലെ ഏറ്റവും വലിയ ഒറ്റക്കക്ഷിയായി എം.എസ്.എഫ് മാറി.
79 യു.യു.സിമാരെ സ്വന്തം നിലക്ക് വിജയിപ്പിച്ചാണ് എം.എസ്.എഫ് ചരിത്ര നേട്ടം നേടിയത്. ജില്ലയില്‍ എം.എസ്.എഫ് തനിച്ച് നാല്‍പതിലധികം കോളജുകളില്‍ യൂനിയന്‍ ഭരണം നേടിയപ്പോള്‍ കെ.എസ്.യു സഖ്യത്തിലൂടെ മുന്നണിയായി 17 കോളജുകളിലും ഭരണത്തിലെത്തി.
15 യു.യു.സിമാരാണ് ജില്ലയില്‍ കെ.എസ്.യു പാനലില്‍ വിജയിച്ചത്. 41 യു.യു.സിമാരെ സ്വന്തംനിലക്ക് വിജയിപ്പിച്ച എസ്.എഫ്.ഐ ജില്ലയിലെ 22 കോളജുകളില്‍ ഭരണം പിടിച്ചു. സ്വന്തമായി അഞ്ച് യൂനിയനുകളും മുന്നണിയുടെ ഭാഗമായി മൂന്ന് യൂനിയനും നേടിയതായി ഫ്രറ്റേണിറ്റി ജില്ലാ കമ്മിറ്റി അവകാശപ്പെട്ടു. 44 ജനറല്‍ സീറ്റുകളാണ് ജില്ലയില്‍ ഫ്രറ്റേണിറ്റി നേടിയത്.