നെടുമ്പാശ്ശേരി: അന്താരാഷ്ട്ര വിമാനത്താവളത്തില്‍ ഡയരക്ടറേറ്റ് ഓഫ് റവന്യു ഇന്റലിജന്‍സ് (ഡി.ആര്‍.ഐ) വിഭാഗത്തിന്റെ വന്‍ സ്വര്‍ണവേട്ട. അനധികൃതമായി കടത്താന്‍ ശ്രമിച്ച 60 ലക്ഷം രൂപയുടെ സ്വര്‍ണമാണ് ഉദ്യോഗസ്ഥര്‍ പിടിച്ചെടുത്തത്.
ഇന്നലെ ഇന്‍ഡിഗോ വിമാനത്തില്‍ ദുബൈയില്‍ നിന്നും നെടുമ്പാശ്ശേരിയിലെത്തിയ തൃശൂര്‍ കൈപ്പമംഗലം സ്വദേശി ഷാഫിയാണ് പിടിയിലായത്.2.6 കിലോഗ്രാം തൂക്കം വരുന്ന സ്വര്‍ണ മിശ്രിതമാണ് ഇയാളില്‍ നിന്നും പിടികൂടിയത്.ഇതില്‍ നിന്നും 60 ലക്ഷം രൂപ വിലവരുന്ന 1.9 കിലോഗ്രാം സ്വര്‍ണം വേര്‍തിരിച്ചെടുക്കുകയായിരുന്നു.പ്രത്യേകം തയാറാക്കിയ പൗച്ചുകളിലാക്കി അടിവസ്ത്രത്തിലാണ് ഇയാള്‍ സ്വര്‍ണം ഒളിപ്പിച്ചിരുന്നത്.ഉറപ്പിനായി അരയില്‍ ബെല്‍റ്റും കെട്ടിയിരുന്നു. കൂടുതല്‍ വിവരങ്ങള്‍ ശേഖരിക്കുന്നതിനായി പിടിയിലായ ഷാഫിയെ പ്രത്യേക സംഘം വിശദമായി ചോദ്യം ചെയ്ത് വരികയാണ്. രഹസ്യ വിവരം ലഭിച്ചതിനെ തുടര്‍ന്നാണ് ഡി.ആര്‍.ഐ വിഭാഗം വിമാനത്താവളത്തില്‍ പരിശോധനക്കെത്തിയത്.