തൃശൂര്‍: തെച്ചിക്കോട്ടുകാവ് രാമചന്ദ്രനെ എഴുന്നള്ളിക്കാന്‍ കലക്ടറുടെ അനുമതി. ഇന്ന് തെക്കേഗോപുര നട തുറക്കാന്‍ രാമചന്ദ്രനെത്തും. മൂന്നംഗ മെഡിക്കല്‍ സംഘം തെച്ചിക്കോട്ടുകാവ് രാമചന്ദ്രന്റെ ആരോഗ്യ പരിശോധന നടത്തിയിരുന്നു. ആനയുടെ ശരീരത്തില്‍ മുറിവകളൊന്നുമില്ലെന്ന് സംഘം കണ്ടെത്തി. തുമ്പിക്കൈക്ക് മുകളിലുണ്ടായിരുന്ന മുറിവ് ഉണങ്ങിയ നിലയിലാണ്. മദപ്പാടിന്റെ ലക്ഷണങ്ങളില്ല. പാപ്പാന്‍മാരുടെ നിര്‍ദേശങ്ങള്‍ പൂര്‍ണമായി അനുസരിക്കുകയും ചെയ്യുന്നുണ്ട്. ആനയ്ക്ക് പൂര്‍ണമായി കാഴ്ച ശക്തിയില്ലെന്ന് പറയാനാകില്ല. ആരോഗ്യനില തൃപ്തികരമായതിനാല്‍ ഉപാധികളോടെ എഴുന്നള്ളിക്കുന്നതിന് തടസമില്ലെന്ന് വിദഗ്ധ സംഘം റിപ്പോര്‍ട്ട് നല്‍കുകയായിരുന്നു. ഇതിന്റെ അടിസ്ഥാനത്തിലാണ് കലക്ടര്‍ അനുമതി നല്‍കിയത്. രാവിലെ 9.30 മുതല്‍ 10.30 വരെ എഴുന്നള്ളിക്കാനാണ് അനുമതി. നാല് പാപ്പാന്മാരുടെ അകമ്പടിയോടെ മാത്രമെ ആനയെ എഴുന്നള്ളിക്കാന്‍ പാടുള്ളൂ. അപകടമുണ്ടായാല്‍ പൂര്‍ണ ഉത്തരവാദിത്തം ഏറ്റെടുക്കുമെന്ന് തെച്ചിക്കോട്ട് ദേവസ്വം ജില്ലാകലക്ടര്‍ക്ക് രേഖാമൂലം എഴുതി നല്‍കിയിട്ടുണ്ട്.