മൂവാറ്റുപുഴ: ആശുപത്രി വരാന്തയില്‍ ചാര്‍ജ്ജ് ചെയ്യാന്‍ വച്ചിരുന്ന മൊബൈല്‍ മോഷ്ടിച്ച രണ്ടുപേരെ മൂവാറ്റുപുഴ പൊലിസ് അറസ്റ്റ് ചെയ്തു.
വയനാട് കണിയാംമ്പറ്റ കുഴിയില്‍ വീട്ടില്‍ അഷ്ഫാക് (38), മൂവാറ്റുപുഴ മുടവൂര്‍ വെളിയത്തുപ്പടി പുത്തന്‍പുരയില്‍ സുനില്‍കുമാര്‍ (45) എന്നിവരെയാണ് അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു. ഇന്നലെ പുലര്‍ച്ചെ 12.30ഓടെ മൂവാറ്റുപുഴ ഗവ. ആശുപത്രിയിലാണ് മോഷണം.
പ്രസവ വാര്‍ഡിന്റെ വരാന്തയില്‍ ചാര്‍ജ്ജ് ചെയ്യാന്‍ വച്ചിരുന്ന പിറവം പാലച്ചുവട് പുളിക്കാമറ്റം വിബിന്റെ 6,000 രൂപയുടെ മൊബൈലും രോഗികളുടെ സഹായികളായ മണീട് നെച്ചൂര്‍ കടുങ്ങാച്ചിറയില്‍ ഉണ്ണിക്കുട്ടന്റെ 18,500 രൂപയുടെയും നാടുകാണി കോട്ടേക്കുടി ബേസിലിന്റെ 9,000 രൂപയുടെ മൊബൈലുകളുമാണ് മോഷ്ടിച്ചത്.
ചാര്‍ജ്ജ് ചെയ്തിരുന്ന മൊബൈലുകളെടുക്കുന്നത് ആശുപത്രി ജീവനക്കാരുടേയും രോഗികളുടേയും ശ്രദ്ധയില്‍പ്പെട്ടതോടെ ചോദ്യം ചെയ്ത് തടഞ്ഞവച്ചശേഷം മൂവാറ്റുപുഴ പൊലിസിനെ അറിയിച്ച് കൈമാറുകയായിരുന്നു.
ചോദ്യം ചെയ്‌തോടെ ഇവരുടെ കയ്യില്‍നിന്ന് മൂന്ന് മൊബൈല്‍ കണ്ടെടുത്തു.
അഷ്ഫാകിന് മൂവാറ്റുപുഴ സ്റ്റേഷനില്‍ കോടതി വാറണ്ട് നിലനില്‍ക്കുന്നുണ്ട്. കൂടാതെ നിരവധികേസിലെ പ്രതിയുമാണ്.