കാസര്‍കോട്: മാപ്പിളപ്പാട്ട് ഗായകന്‍ എം.കെ അബ്ദുല്ല എന്ന തനിമ അബ്ദുല്ല അനുസ്മരണവും പുരസ്‌കാര വിതരണവും നാളെ മൊഗ്രാല്‍ വൊക്കേഷണനല്‍ ഹയര്‍സെക്കന്‍ഡറി സ്‌കൂള്‍ ഗ്രൗണ്ടില്‍ നടക്കും. വൈകുന്നേരം നാലിന് പി.ബി അബ്ദുല്‍റസാഖ് എം.എല്‍.എ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ അധ്യക്ഷനാവും.
എം.കെ അബ്ദുല്ലയുടെ സ്മരണാര്‍ഥം തനിമ മാപ്പിള കലാ ആസ്വാദക സംഘം ഏര്‍പ്പെടുത്തിയ ഇശല്‍ഗ്രാമ പ്രഥമ പുരസ്‌കാരം മാപ്പിളപ്പാട്ട് ഗായകന്‍ അഷ്‌റഫ് പയ്യന്നൂരിനു സമ്മാനിക്കും. പതിനായിരം രൂപയും പ്രശസ്തി പത്രവും അടങ്ങുന്നതാണു പുരസ്‌കാരം.
ചടങ്ങില്‍ കലാകായിക രംഗങ്ങളില്‍ സംഭാവന നല്‍കിയവരെ ആദരിക്കും. കര്‍ണാടക മന്ത്രി യു.ടി ഖാദര്‍, എന്‍.എ നെല്ലിക്കുന്ന് എം.എല്‍.എ, ടി.കെ ഹംസ എന്നിവര്‍ മുഖ്യാതിഥികളാവും. പ്രൊഫ. എം.എ അബ്ദുറഹ്മാന്‍, അഡ്വ. സി.എച്ച് കുഞ്ഞമ്പു, എം.സി ഖമറുദ്ധീന്‍, കെ.പി സതീഷ് ചന്ദ്രന്‍, കുമ്പള സി.ഐ മനോജ്, ആദൂര്‍ സി.ഐ സിബി തോമസ്, അസീസ് കടപ്പുറം സംസാരിക്കും.
തുടര്‍ന്ന് എം.കെ അബ്ദുല്ല നിര്‍മിച്ച 'ഇശല്‍ ഗ്രാമം വിളിക്കുന്നു' എന്ന ഡോക്യുമെന്ററിയുടെ പ്രദര്‍ശനവും ഇശല്‍ സന്ധ്യയും അരങ്ങേറുമെന്ന് സംഘാടക സമിതി ഭാരവാഹികളായ കെ.എം മുഹമ്മദ്, താജുദ്ധീന്‍, അബ്ദുല്‍ സലാം, എ.എസ് മുഹമ്മദ് കുഞ്ഞി, അസീസ്, ഹമീദ് എന്നിവര്‍ വാര്‍ത്താസമ്മേളനത്തില്‍ അറിയിച്ചു.