കാസര്‍കോട്: ഗുഡ്‌മോണിങ് കാസര്‍കോട് സംഘടിപ്പിക്കുന്ന കാസര്‍കോട് മാരത്തണ്‍ നാളെ നടക്കും. താളിപ്പടുപ്പ് മൈതാനം മുതല്‍ കാസര്‍കോട് മുനിസിപ്പല്‍ സ്റ്റേഡിയം വരെ 5.5 കിലോമീറ്ററാണ് മാരത്തണ്‍ ഓട്ടം സംഘടിപ്പിച്ചിരിക്കുന്നത്. 'ആരോഗ്യവും സൗഹൃദവും' എന്ന സന്ദേശവുമായി നടക്കുന്ന മാരത്തണില്‍ വിവിധ ജില്ലകളില്‍ നിന്നായി ആയിരത്തോളം പേര്‍ പങ്കെടുക്കും. പുരുഷ, വനിതാ വിഭാഗങ്ങളിലാണു മത്സരം. ആദ്യ മൂന്നു സ്ഥാനത്തെത്തുന്നവര്‍ക്ക് 10,000, 5000, 3000 രൂപയും ട്രോഫിയും സര്‍ട്ടിഫിക്കറ്റും മെഡലും നല്‍കും. ജില്ലയില്‍ നിന്നുള്ള ആദ്യ മൂന്നു സ്ഥാനക്കാര്‍ക്കും 45 വയസിനു മുകളിലുള്ളവര്‍ക്കും പ്രത്യേക സമ്മാനം നല്‍കും. പങ്കെടുക്കുന്ന എല്ലാവര്‍ക്കും മെഡലും ജഴ്‌സിയും നല്‍കും. പങ്കെടുക്കുന്നവര്‍ രാവിലെ അഞ്ചിനും 6.30നുമിടയില്‍ താളിപ്പടുപ്പ് മൈതാനിയിലെത്തി രജിസ്റ്റര്‍ ചെയ്യണം.
രാവിലെ ഏഴിനു ജില്ലാ കലക്ടര്‍ കെ. ജീവന്‍ബാബു, ജില്ലാ പൊലിസ് മേധാവി കെ.ജി സൈമണ്‍ എന്നിവര്‍ ചേര്‍ന്നു മാരത്തണ്‍ ഫ്‌ളാഗ് ഓഫ് ചെയ്യും. മുനിസിപ്പല്‍ സ്റ്റേഡിയത്തില്‍ 8.30നു നടക്കുന്ന സമാപനം മന്ത്രി ഇ. ചന്ദ്രശേഖരന്‍ ഉദ്ഘാടനം ചെയ്യും. ഇന്ത്യന്‍ വ്യോമസേന ഫുട്‌ബോള്‍ ടീം അംഗവും ഇന്ത്യാ-പാക്ക് യുദ്ധത്തില്‍ പങ്കെടുക്കുകയും ചെയ്ത അല്‍ത്താഫ് ഹുസൈന്‍, അന്തര്‍ദേശീയ കാര്‍ റാലി ചാംപ്യന്‍ മൂസ ഷെരീഫ്, കേരള രഞ്ജി ക്രിക്കറ്റ് ടീം അംഗം മുഹമ്മദ് അസ്ഹറുദ്ദീന്‍, ബുള്ളറ്റില്‍ 15 ദിവസം കൊണ്ട് 2300 കിലോമീറ്റര്‍ ഹിമാലയന്‍ ഒഡീസി യാത്ര നടത്തിയ ആദ്യത്തെ കേരള വനിത പി.എന്‍ സൗമ്യ, മലേഷ്യയില്‍ നടന്ന ഏഷ്യന്‍ ത്രോബോള്‍ ചാംപ്യന്‍ഷിപ്പില്‍ ഇന്ത്യന്‍ ജൂനിയര്‍ ടീമംഗമായ ബെള്ളൂരിലെ എം. യഷ്മിത എന്നിവരെ ആദരിക്കും.
എം.എല്‍.എമാരായ എന്‍.എ നെല്ലിക്കുന്ന്, പി.ബി അബ്ദുല്‍റസാഖ്, കെ. കുഞ്ഞിരാമന്‍, എം. രാജഗോപാലന്‍, നഗരസഭാധ്യക്ഷ ബീഫാത്തിമ ഇബ്രാഹിം, കെ. ശ്രീകാന്ത്, ജില്ലാ പ്ലീഡര്‍ പി.വി ജയരാജന്‍, പ്രസ്‌ക്ലബ് പ്രസിഡന്റ് സണ്ണി ജോസഫ് എന്നിവര്‍ സമ്മാനദാനം നിര്‍വഹിക്കുമെന്ന് സംഘാടക സമിതി ഭാരവാഹികളായ ഹാരിസ് ചൂരി, ബാലന്‍ ചെന്നിക്കര, എ.വി പവിത്രന്‍, മുഹമ്മദ് ഹാഷിം, ഫസല്‍ റഹ്മാന്‍, കെ.ജി റയീസ് എന്നിവര്‍ വാര്‍ത്താസമ്മേളനത്തില്‍ അറിയിച്ചു. ഫോണ്‍: 9446673961, 9446981133.